Comissão da Função Pública

Ministériu Saúde hamutuk ho Komisaun Funsaun Públika fó tan posse ba kargus diresaun xefias nain 13 husi Hospital Nasional Guido Valadares (HNGV) no Institutu Nasionál Farmásia no Produtu Médiku (INFPM) no Servisu Sentrais iha Ministériu Saúde kompostu husi feto nain 4 no mane nain 9.

Komisáriu Komisaun Funsaun Públika ba asuntu Disiplinar, Agapito da Conceição iha ninia intervensaun iha serimónia posse ne’e hateten,  servisu ne’ebé emposadu sira simu ne’e todan, tanba ne’e presiza ita nia kapasidade, matenek, atu bele asume kargu ne’e ho di’ak atu bele fó atendimentu ida ba povu atu labele iha tan krítiku sira.

Komisáriu fó hanoin ba emposadu sira, atu tau matan ba rekursu umanus, tanba saúde importante tebes, tanba Primeiru-Ministru husu ba KFP atu tau atensaun ba rekursu umanus no uza ita nia kapasidade, intelektualidade no husu ba funsionáriu sira no sensante sira atu suporta diretores foun sira atu halo funsaun no servisu ho di’ak.

Vise-Ministru ba Fortalesimentu Institusional ba Sáude, José dos Reis Magno iha diskursu hateten, Ministériu Saúde hanesan ministériu ida ne’ebé ema hotu dekora di’ak loos, saida mak akontese iha saúde. Nomadu sira iha kapasidade ida di’ak liu hodi ezekuta no kompeténsia ne’ebé mak fó, tenke fokus, hanesan jestór tenke servisu di’ak liután.

Vise-Ministru husu ba INFPM atu haree ba stock aimoruk minimal tenke 80 pursentu, labele tun husi 80 pursentu, tanba 80 pursentu signifika di’ak hela no stock aimoruk ne’ebé sufisiente, maibé labele husik to’o 80 pursentu mak foin bele informa, situasaun  ne’e presiza tau atensaun atu hadia. Iha taxa konsultasaun 2024 di’ak, tuir estatístika sistema saúde  ne’ebé mak ita hetan ita tama ba situasaun ida ne’ebé di’ak loos. Maibé ita nia populasaun tomak komprende loloos saida mak saúde ne’ebé haree ba atendimentu ne’ebé di’ak tebes, no Ha’u sempre dezafia kargu sira atu taxa konsultasaun ba tinan oin mai bele di’ak liután.

Emposadu sira ne’ebé simu posse kompostu ba kargu hanesan diretor ezekutivu nain 2, diretor naional nain 5, xefe departamentu nain 4 no xefe seksaun nain 2.

.