Comissão da Função Pública

Komisáriu Komisaun Funsaun Públika Portefóliu Disiplinar, Agapito da Conceição prezensa iha formasaun ba funsionáriu públiku nain rua nulu resin lima (25) tuir formasaun kona-ba regras no prosedimentu funsaun públika durante loron rua (07-08/11/2024),  ne’ebé kompostu husi feto nain 13 no mane nain 12 husi Autoridade Aduaneiro, iha salaun Ministériu Finansas.

Matéria ne’ebé sei fó husi orador sira Komisaun Funsaun Públika (KFP) nian kona-ba asédiu seksual, deveres no direitu iha Estatutu Funsaun Públika, Llisensa no faltas, prosesu disiplinar, prosedimentus administrativu aplikasaun pena disiplinar no efeitu sira, no orador seluk mai husi Institutu Nasionál Seguransa Sosial (INSS) hodi fó materia kona-ba lei seguransa sosial nian.

Iha abertura formasaun ne’e liu husi intervensaun Komisariu Portefóliu Disiplinar, Agapito da Conceição informa ba partisipantes sira kona-ba prioridade IV mandatu KFP mai ho reforma Administrasaun Públika ne’ebé sei implementa iha tinan lima nia laran, ne’ebé mai ho komponentes 18 liga ba governasaun di’ak ein termus lei KFP mai disemina dekretu lei sira hodi fanu funsionárius públikus atu inteira no hatene ligadu ba direitu, deveres no proibisaun sira tuir estatutu funsaun públika define. Tamba iha Autoridade Aduaneiro ne’e prinsipal liu mak presiza profesionalizmu iha atendimentu ba públiku, la koñese loron feriadu ka loron bo’ot.

Komisáriu ko’alia, nu’udar funsionarius tenke ho mentalidade ida duru, ne’ebé presiza tuir formasaun sira hanesan ne’e hodi hatene bandu sira atu evita labele mosu iregularidades, atu iha transjerasaun sira labele akontese. Seluk fali, presiza iha ambiente servisu ida saudavel, ne’e atu evita labele mosu asédiu seksual iha Administrasaun Públika.

Primeiru-Ministru, Kay Rala Xanana Gusmão fó ona orientasaun ba ekipa konjunta KFP, KAK, IGE, PDHJ, INSS, Ministériu Edukasaun, Sekretariu Estadu Igualdade, Ministériu Finanasas-Diresaun Jeral Jestaun Patrimoniu Estadu hodi kontinua disemina informasaun sira ba munisípiu to’o postu administrativu sira ho objetivu ida atu kontinua habelar informasaun, kontinua hasa’e koñesimentu ba funsionárius públikus no ajentes administrasaun públika hodi hatene kona-ba regras no prosedimentu iha Administrasaun Públika, halo atendimentu ida ba públiku ho umildade, onestu, transparente no evita iregularidades, dehan Komisáriu KFP, Agapito da Conceição iha kinta-feira ne’e, (07/11/2024).

Reprezentante Komisáriu Autoridade Aduaneira iha abertura formasaun ne’e husu ba partisipantes sira atu aproveita loron rua ne’e akompaña hodi aprende buat ruma husi materia ne’ebé orador sira aprezenta, saida mak imi ladún apar, husu atu orador sira esplika klaru hodi imi entende didiak.

Reprezetante Aduaneira ne’e hateten, nu’udar funsionáriu públiku tenke kompriende didiak matéria lae ba asédiu seksual, tanba ne’e impaktu ba individual no Instituisaun, no matéria kona-ba seguransa sosial, presiza hatene hatene kona-ba reforma obrigatoriu, mate, tratamentu saúde, vellise no invalidez presiza hatene ninia prosesu sira.

Formasaun ne’e ofisialmente loke husi reprezentante Komisáriu Autoridade Aduaneira no kontinua kedas ho aprezentasaun matéria dahuluk husi Diretor Nasional Étika, Disiplina no Prodedimentus Administrativus iha

Funsaun Públika (DNEDPAFP) kona-ba lae ba asédiu seksual iha funsaun públika no matéria seluk ne’ebé sei kontinua lori husi ekipa KFP.