Comissão da Função Pública

Formasaun no Dezenvolvimentu ba Funsionáriu Públiku iha  Timor-Leste, bazeia ba liña koordenasaun entre Komisaun Funsaun Públika ho Institutu Nasionál Administrasaun Públika (INAP) inklui mós ho Fundu Dezenvolvimentu Kapital Humanu (FDCH), asegura husi Lei númeru, 7/2007, 15 de Jullu, tuir Estatutu Funsaun Públika, no Dekretu Lei 13/2020 kona-ba kompeténsias entidade tolu nian liga ho formasaun no dezenvolvimentu.

Diretor Nasional Planeamentu Kuadru Pesoal Komisaun Funsaun Públika, Francisco da Costa Pereira, hato’o Informasaun ne’e liu husi Debate iha Programa Povu nia Matadalan kona-ba Planu no kordenasaun  formasaun jeneriku no espesialidade ho instituisaun Estadu iha Rádiu Metro-FM iha Kintal Boot Dili, kuarta-feira, 15 Fevereiru 2023.

Tuir Diretor katak, maske Instituisoens relevantes sira sidauk produz manual ruma hodi define kalendáriu submisaun planu Formasaun, maibé apenas liu husi koordenasaun verbal hodi hala’o formasaun durante ne’e ba funsionáriu sira.

Maske seidauk kria manual, maibé komprometidu ona katak, ba futuru sei tur hamutuk hodi kria manual ida hanesan matadalan ida hodi asegura formasaun.

Enkuantu Diretor Nasional Formasaun Kuadru Pesoal INAP nian, José de Araújo Chang hateten, formasaun ne’ebé durante ne’e hala’o fahe ba parte rua, maka formasaun jenériku no formasaun espesializada. Formasaun jenériku fahe ba rua maka obrigatória ho tékniku opsional, formasaun obrigatóriu maka Indusaun jeral kursu Pré-Servisu ba funsionáriu rekrutadus foun no formasaun espesializada maka formasaun líder báziku, médiu no  superior.

Formasaun refere mós abranje ona ba Munisípiu sira nune’e mós bazeia ba pedidu ne’ebé maka husi Instituisaun balun ho sira nia fundu rasik atu aumenta sira nia kapasidade.

Diretor Nasional José  de Araújo Chang, rekoñese formasaun ne’ebé maka durante ne’e hala’o la’ós de’it atu hetan sertifikadu hodi aumenta ba sira nia pontuasaun wainhira tuir promosaun ba grau maibé, durante ne’e hala’o formasaun hodi aumenta kapasidade hodi halo mudansa ba servisu diáriu.

Diretor DNQPFP, Francisco da Costa Pereira husu ba institusiaun Estadu hotu, planu formasaun no dezenvolvimentu hahú 2024 sei la halo anualmente, ne’e’bé mak KFP hasai ona konvite ba planu tinan lima nian ba formasaun no dezenvolvimentu no instituisaun sira ne’ebé ninia realizasaun ne’e atu hadia dezempeñu no aproveita aplika liu husi sira nia servisu fatin.

Iha mensajen Diretor formasaun INAP katak, ba diretor ka xefe departamentu rekursu umanus kada instituisaun ne’ebé mak responsabiliza, wainhira simu informasaun husi INAP atu nomeia funsionáriu tuir formasaun tenke iha tratamentu hanesan no fó oportunidade ba funsionáriu hotu hetan, tanba funsionáriu hotu iha direitu ba kada tinan ida hetan formasaun oras 40.