Comissão da Função Pública

Institutu Nasionál Formasaun Dosentes no Profisionais ba Edukasaun (INFORDEPE) nia knár no mandatu importante no pertinente atu oinsá asegura kualidade edukasaun iha eskola hot-hotu iha teritáriu Timor laran tomak liu husi atividade formasaun ba profesores sira ne’ebé ho kualidade no profesional.

Komisáriu portefoliu ba Forsa Traballu, José Telo Soares Cristovão  hato’o mensajen ne’e iha serimónia tomada de posse ba vise Prezidente foun iha Gabinete formasaun profesional INFORDEPE, Domingas Belo Amaral Mendes iha tersa-feira, (17/09/2024), iha salaun Ian Martin no INFODEPE Balide, Díli.

José Telo Soares Cristovão subliña, kona-ba kualidade edukasaun iha Timor-Leste INFORDEPE nu’udar sentru formasaun ida ba profesores sira nia kualidade, hein katak sei reforma estrutura ne’e hodi hadia di’ak liután kualidade formasaun professores iha Timor-Leste.

Komisáriu ne’e husu ba dirijente INFORDEPE no Ministériu atu hasa’e bebeik kualidade edukasaun iha eskola hotu iha teritóriu laran tomak, no husu mós atu tau planu prioridade formasaun ba diretores foun sira iha eskola sira to’o áreas remotas, nune’e atu kontinua asegura kualidade edukasaun iha área rurais ho di’ak liután, oinsá atu asegura kualidade edukasaun ida ba determinasaun INFORDEPE rasik, no husu ba hot-hotu atu servisu hamutuk ho responsabilidade.

Entretantu, Sekretariu Estadu Ensinu Sekundáriu Jeral no Ensinu Tékniku Vokasional, Domingos Lopes Lemos hateten, ho posse ne’ebé fó ba sra. Domingas Belo A. Mendes hodi substitui sra. Verónica Soarea ne’ebé halo hela estudu iha Korea Sul, no konsidera ho mudansa estutura INFORDEPE bele lori mudansa ba atividades formasaun ba professores iha teritóriu laran tomak.

Sekretáriu Estadu ne’e hateten, atu hetan susesu presiza kuda espíritu ou valor kooperasaun, kolaborasaun servisu hamutuk ho estrutura foun ne’ebé mai ho nia matenek no esperensia hodi bele partilla prátika di’ak sira hodi kontribui ba servisu lor-loron nian hodi hadia ba programa prioridade sira ba alkansa mehi Ministériu Edukasaun liu husi kualidade edukasaun iha Timor-Leste.

EmposadaDomingas Belo Amaral Mendes iha ninia kompromisu sei atinji susesu INFORDEPE durante nia mandatu tenki konta mós tulun servisu hamutuk ne’ebé di’ak.

Domingas Belo Amarak Mendes kompromete durante ninia responsabilidade ne’ebé aas ba servisu husi funsionáriu no entidade hotu iha INFORDEPE, hanesan referensia no sasukat ba ninia prezensa hodi kontribui ba hadia sistema formasaun ba professores sira hodi elabora planu estratéjiku no hamosu padraun ida adekuadu ba professores sira iha baze.

Partisipa iha serimónia tomada de posse ne’e reprezentante Prezidente Komisaun G Parlamentu Nasional ba Asuntu Edukasaun, Prezidente INFORDEPE, reprezentante FDCH,  kargu diresaun xefias husi Ministériu Edukasaun no INFORDEPE, funsionárius no família emposadu.