Comissão da Função Pública

Ekipa integradu lidera husi Komisaun Funsaun Públika Komisariu KFP portefóliu pensaun no reforma Fausto Freitas da Silva hamutuk ho entidade husi MSSI-INSS, MAE, MNEK, Ministériu Finansas-Diresaun Jeral Jestaun Patrimóniu Estadu, SEI, KAK, IGE, PDHJ, no CRAM kontinua disemina informasaun ligadu legislasaun sira, prosedimentus no regras funsaun públika nian ba kargus diresaun, xefias no funsionárius iha munisípiu Likisá durante loron lima (26-30 maiu 2025), iha salaun Administrativu Munisípiu Likisa.

Iha abertura ne’e ofisialmente hala’o iha segunda-feira, (26/05) husi Komisáriu KFP, Fausto Freitas da Silva no Prezidente Autoridade munisípiu Likisá, Paulino Ribeiro.

Objetivu husi diseminasaun ne’e atu kontinua partilla no disemina ba servidor públiku sira kona-ba kuadru normativu sira, dekretu lei, no regulamentu sira atu kontinua kapasita no hasa’e koñesimentu ho di’ak liután, ho profisional, efisiensia no efikasia.

Komisáriu KFP iha ninia liafuan abertura hateten, diseminasaun ne’e ba atu hatu’ur aliserse administrasaun públika ida ho baze ba profisionalizmu, no méritu. Presiza tau prioridade ba formasaun no kapasitasaun ho forma regular ba servidor públiku sira, tanba ita nia estatutu forte wainhira servidor públiku ja ajente tenke forte no prontu atu kumpri sira nia misaun.

KFP hamutuk ho instituisaun relevante sira iha ekipa integradu konsiente katak, funsionáriu públiku sira presiza iha oportunidade ba formasaun no dezenvolvimentu ne’ebé di’ak nune’e, prepara di’ak liután hodi hala’o misaun, dehan Komisáriu  Fausto Freitas da Silva.

Iha tempu hanesan Prezidente Autoridade Munisípiu Likisá Paulino Ribeiro iha ninia intervensaun, agradese ba KFP no ekipa integradu ne’ebé realiza diseminasaun ba prosesu prosedimentu administrasaun públika nian hodi fó hanoin ba diretor no administrador sira atu tuir ho seriedade, katak tuir to’o remata. Tanba oportunidade ne’e atu aumenta kapasidade no inteira di’ak liután iha regras no prosedimentu sira. Alende ne’e hetan mós sertifikadu ba pontus hirak ne’e sei valoriza, no husu mós, atu aproveita didiak durante orador sira partilla informasaun.

Hafoin abertura, kontinua aprezentasaun matéria husi MAE, kona-ba Dekretu Lei, númeru 84/2023 kona-ba Organizasaun Administrativa. No materia husi ekipa Sekretariadu KFP kona-ba roteiru prosesu disiplinar, lae ba asédiu seksual iha funsaun públika.

Partisipantes hamutuk nain 111, kompostu husi feto nain 26 no mane nain 85, husi kargus diresaun xefias, funsionárius permanentes, ajente administrasaun públika inklui kazuais.