Comissão da Função Pública

DILI, 02 Marsu 2026 – Komisaun Funsaun Públika (KFP) hamutuk ho Ministériu Finansas (MF) no Ministériu Obras Públikas (MOP) hala’o sorumutu ho Primeiru-Ministru hodi relata progresu servisu ne’ebé sira hala’o ona iha Rejiaun Administrativa Espesiál Oé-Cusse Ambeno (RAEOA).

Ekipa triballu relata rezultadu ne’e hodi simu orientasaun direta ne’ebé Xefe Governu fó, ho objetivu atu asegura katak dezenvolvimentu no jestaun administrasaun iha RAEOA la’o tuir planu no kriteria ne’ebé fiksa ona.

Iha enkontru ne’e, ekipa traballu aprezenta progresu iha área estratéjika sira hanesan jestaun finanseira ne’ebé ezekuta ho mekanizmu fiskalizasaun nian iha rejiaun laran, iha área infraestrutura ba dezenvolvimentu fíziku no manutensaun ba projetu sira ne’ebé foin remata no sira ne’ebé sei la’o hela.

No husi KFP ninia parte Prezidente KFP, Agostinho Letêncio de Deus, hamutuk ho Komisáriu José Telo Soares Cristovão, relata situasaun forsa traballu no planeamentu funsionáriu públiku nian iha enklave laran.

“Servisu ne’ebé hala’o iha RAEOA nu’udar prioridade hodi asegura katak povu iha enklave mós sente kualidade servisu públiku ne’ebé hanesan ho munisípiu sira seluk,” relata Prezidente KFP, Agostinho Letêncio de Deus iha audiensia ho Xefe Governu.

Sorumutu ne’ebé hala’o ho káratér urjente ne’e konta ho prezensa husi Ministra Finansas Santina José Rodrigues F. Viegas Cardoso, Ministru Obras Públikas Samuel Marçal, Prezidente KFP Agostinho Letêncio de Deus no Komisáriu Portfóliu Planeamentu Forsa Traballu José Telo Soares Cristovão.

Enkontru ne’e remata ho kompromisu hodi kontinua monitoriza servisu hotu iha RAEOA, hodi nune’e bele fó resposta ne’ebé rápidu no efisiente ba nesesidade komunidade nian iha RAEOA.