Comissão da Função Pública

Ministériu Edukasaun no Komisaun Funsaun Públika fó posse no asinatura termu aseitasaun ba professores bolsa kandidatura ba Ensinu Báziku hamutuk 178 iha Segunda-feira, 29/09/2025, iha salaun Ian Martin INFORDEPE, Matadouro, Díli.

Iha diskursu Prezidente Komisaun Funsaun Públika Interinu, José Telo Soares Cristovão dehan, durante prosesu rekrutamentu ba bolsa kandidatus ba profesores ne’e mai husi imi ida-idak ninia essforsu. Tanba nasaun ne’e atu di’ak ka la’e kabe ba imi hotu, no imi-nia servisu ida-ne’e la’ós fasil, tanba kualidade Edukasaun ne’e la’ós mai husi Ministra/o ka Sekretáriu Estadu sira, maibé mai husi profesór ka manorin sira inklui imi na’in-178.

“Agora daudaun simu tomada de pose ne’e, nasaun presiza ita hotu nia kontribuisaun atu nune’e lori ita-nia nasaun ne’e ba oin di’ak liután. Imi mak sai erói foun, no imi tenke hanorin ita-nia oan sira ho didi’ak atu nune’e bele produz ema di’ak no matenek iha futuru, atu nune’e kontinua servi ba Estadu no lori Nasaun ne’e ba oin,”

hateten Prezidente KFP Interinu, José Telo Soares Cristovão.

Iha fatin hanesan, S.E. Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes Lemos afirma, sai ona profesór tenke iha responsabilidade atu forma ema-nia hanoin no inspira ema-nia laran no mós dezenvolve poténsia ne’ebé limitadu husi estudante ida-idak, no tenke iha responsabilidade atu kria ambiente aprendizajen ida-ne’ebé seguru, inkluzivu no istimulativu.

“Imi mai hamutuk iha fatin ida-ne’e atu halo juramentu no kompromisu. Tanba ne’e, kompromisu ne’ebé mak imi halo tenke hakruk no tenke la’o tuir imi-nia kompromisu ne’e. No agora daudaun Diretór Servisu Edukasaun Munisípiu sira mós mai hamutuk hodi hein imi tuir kolokasaun ne’ebé mak Ministériu Edukasaun koloka ona, atu nune’e ida-idak ba hala’o nia servisu iha Servisu Edukasaun Munisípiu tuir ida-idak koloka ba. Imi halo juramentu katak “ha’u prontu atu servisu iha fatin ne’ebé de’it”, no nu’udar Funsionáriu Públiku tenke hatene papel atu rai segredu nasionál hanesan funsionáriu públiku no tenke lealdade ba servisu hodi lori nasaun ne’e ba oin.” Afirma Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes Lemos.

Professores ne’ebé ofisialmente simu ona posse sei koloka ba munisípiu sira ne’ebé hanesan Aileu na’in-6 (Feto na’in-5, Mane na’in-1), Ainaro na’in-10 (Feto na’in-7, Mane na’in-3), Baucau na’in-13 (Feto na’in-10, Mane na’in-3), Bobonaro na’in-15 (Feto na’in-7, Mane na’in-8), Kovalima na’in-23 (Feto na’in-13, Mane na’in-10), Dili na’in-23 (Feto na’in-19, Mane na’in-4), Ermera na’in-16 (Feto na’in-5, Mane na’in-11), Lautem na’in-16 (Feto na’in-9, Mane na’in-7), Liquiça na’in-15 (Feto na’in-7, Mane na’in-8), Manatuto na’in-5 (Feto na’in-4, Mane na’in-1), Manufahi na’in-11 (Feto na’in-2, Mane na’in-9), Viqueque na’in-20 (Feto na’in-12, Mane na’in-8), no RAEOA mane na’in-5.