Comissão da Função Pública

Dili, 10 Setembru 2026 — Komisáriu Komisaun Funsaun Publika – KFP Portefóliu Pensaun no Reforma, Jorge Paiva Araújo, reprezenta KFP partisipa iha Missa Solene Homenajen ikus ba restus mortais saudoso Dom Jaime Garcia Goulart, Dom José Joaquim Ribeiro, Dom Alberto Ricardo da Silva no Monsenhor Martinho da Costa Lopes, iha Esplanada Tasi-Tolu Dili.

Missa solene ne’e prezide hosi Arsebispu Metropolitana Dili, Dom Virgílio Cardeal do Carmo da Silva, SDB, hahú ho desfile militar ne’ebé lori restus mortais preladus sira ba iha Altar.

Serimónia ne’e sai momentu solene ida atu fó homenajen no reza hamutuk, komunidade Timor oan ho autoridade sivíl no militár, hodi fó respeitu ba kontribuisaun no legadu preladus sira nian ba Igreja Katólika no povu Timor-Leste.

Missa Solene ne’e mos sai oportunidade ba Igreja no komunidade Timor oan sira atu hanoin fila-fali servisu pastoral, lideransa no kontribuisaun preladus sira nian iha dezenvolvimentu moral, espirituál, sosiál no istóriku, liuliu sira nia papel iha prosesu luta ba libertasaun nasionál Timor-Leste.

Ema rihun ba rihun mai husi Diocese Dili, Diocese Baucau no Diocese Maliana, Reprezentante Sarani Dioseze Vizinho Atambua Indonesia inklui estudante sira, membru Governu no membru Parlamentu Nasionál, partisipa iha Missa Solene Homenajen ikus ne’e iha Esplanada Tasi-Tolu Dili.

Primeiru-Ministru Kay Rala Xanana Gusmão, ne’ebé mos partisipa iha Missa Solene ne’e, lori povu no Governo Timor-Leste nia naran fó homenajen ba papel boot Igreja Katólika nian iha misaun evanjelizasaun, edukasaun no formasaun moral, ne’ebé konsidera importante tebes ba hari no hametin kultura, identidade no unidade Timor oan sira nian. Hafoin Missa Solene remata, kontinua ho transladasaun restus mortais preladus sira husi Esplanada Tasi-Tolu ba Katedral Dili, akompana hosi Primeiru-Ministru, Prezidente Tribunál Rekursu, Prezidente Parlamentu Nasionál, membru Governu no membru Parlamentu Nasionál, kontinua ho serimónia funebre iha Igreja Katedral Dili.