Comissão da Função Pública

Kinta-feira -11/01/2024, Prezidente Komisaun Funsaun Públika, Agostinho Letêncio de Deus no Komisariu José Telo Soares Cristovao partisipa serimonia tomada de posse ba kargu diresaun no xefia iha Ministeriu Juventude, Desportu, Arte no Kultura (MJDAC) hamutuk nain 60 kompostu kargu Diretor Jeral, Diretor Nasional no xefe departamentu ho mandatu ba fulan neen. 

Prezidente KFP, Agostinho Letêncio de Deus iha diskursu hateten, ho serimóna tomada de posse ba kargu diresaun no xefia ho hanoin ida atu deklara ba públiku kona-ba konfiansa husi MJDAC atu halo servisu ho responsabilidade hodi asegura ho sizilu dokumentus administrasaun públika liga ba dezisaun sira ne’ebé kobre ba Ministeriu nian.  

Alende ne’e bainhira IX Governu transforma Sekretariu Estadu Juventude no Desportu ba Ministeriu Juventude Desportu Arte no Kultura  signifika maske funsionariu no kargu xefia sira ema tuan maibé ,tenki mai ho espiritu  foun  hodi hatan ba ezijensia públiku kona-ba administrasaun ida ne’ebé garante gastus kiik maibé, rezultadu boot no efisiensia, kria forsa no eroi foun ba administrasaun ida ba iha futuru.

Agostinho Letêncio de Deus subliña jornada Timor-Leste nian iha pasadu kria ona eroi lubuk ida, no iha faze dezenvolvimentu MJDAC asume responsabilidade atu kria eroi foun ba futuru Timor-Leste tanba, ne’e ezije emposadu/a sira atu servisu ho pensamentu mudansa ho kreativu, inovativu iha fuinsaun públika hodi apoiu servisu Ministru no Secretariu Estadu    hodi apoiu programa IX Governu ba mudansa Governasaun.  

Molok remata Autoridade KFP husik hela mensajen ba emposadu/a sira katak, bainhira atu kontinua mandatu kargu diresaun no xefia ba tempu oin mai depende ba prestasaun servisu durante mandatu fulan neen.

Entretantu,  Ministru Juventude Desportu Arte no Kultura (MJDAC), Nélio Isaac Sarmento hateten, aktus tomada ba kargu diresaun no xefia iha diresaun g’jeral Juventude Desportu primeira vez akontese. Tanba ne’e husu ba funsionariu no kargu diresaun no xefia iha MJDAC atu labele haree aktus ne’e normal maibé, oinsá atu hasa’e no mellora instituisaun ida ne’e ninia profesionalizmu servisu ho prestasaun servisu ba públiku ho di’ak liu tan. 

Tuir nia aktu indika ema ba kargu xefia, troka ema, hasai ema no muda pozisaun xefia iha organizasaun ka instituisaun públiku ida nian maka ho objetivu atu hasa’e kapasidade instituisaun iha forma hot l-hotu no hanesan modelu formasaun ba kareira funsionariu públiku. Tanba ne’e husu ba emposadu/a sira atu haree aktu posse ne’e lá’os ba de’it interese funsionariu sira ne’ebé hetan fiar ba kargu xefia, maibé, aktus ne’e nu’udar enpeñu ida ba hadia Ministeriu hodi aumenta produtividade atendimentu publiku hodi fó priodidades ba programa Ministeriu iha IX Governu Konstitusional nian.

Ministru MJDAC mós kontinua husu ba emposadu sira atu servisu ho integridade loyalidade, disiplina no ho komitmentu ba servisu ne’ebé simu ho responsabilidade. Servisu tenki sensitivu, responsivu ba kualker dezafiu no problema ne’ebé mosu, iha koñesementu no vizaun dook hodi ultrapasa ho pensamentu kreativu, inovativu ba interese Ministeriu nian.

Nia dehan, tenki iha koñesementu, kapasidade hodi halo kombinasaun husi fontes hot-hotu atu utiliza didiak rekursus umanus ne’ebé iha ho másimu, nune’e bele hetan produtividade ho másimu liu husi servisu unidade ho pensamentu servisu grupu hodi fó rezultadu ne’ebé di’ak ba nasaun no povu Timor-Leste. 

Serimonia tomada de posse hala’o iha MJDAC Lecidere, Díli konta ho partisipasaun Sekretariu Estadu Arte no Kultura, Prezidente no Komisariu Komisaun Funsaun Públika, funsionariu MJDAC, inklui familia emposadu/a.