Comissão da Função Pública

Ohin,  27 Marsu 2019 –  Prezidente Komisaun Funsaun Públika, Faustino Cardoso Gomes ho Komisaria Asuntu Servisu Reforma no Pensaun,  Maria Domingas Fernandes Alves partisipa iha serimonia aniversariu PNTL  ba dala 19 ho tema maka “Ho Aniversariu PNTL  ba dala 19 Ita Hametin Konsolidasaun Institusional Hodi Promove no Kombate Krimi atu Asegura Paz no Estabilidade Iha Timor-Leste”, ne’ebé selebra iha Akademia Polisia Comoro, Dili.

Prezidente Repúblika RDTL, S.Exa. Fransisco Guteres Lu-Olo sai inspektor ba serimonia isar bandeira aniversariu PNTL dala 19, hafoin kontinua fó pose ba Adjuntu Komisariu PNTL, Faustino da Costa hodi troka Komisariu PNTL, Julio Hornai, no Mateus Fernandes simu pose sai Adjuntu Komisariu  PNTL ba mandatu tinan haat oin mai.

Komisariu Faustino da Costa iha nia diskursu hateten, tinan 2019 nu’udar tinan ba mudansas, tamba ne’e sei profisionaliza liu tan membru PNTL hodi hakbesik liu ba povu, hametin koordenasaun servisu hodi reduz númeru krimi ne’ebé oras ne’e ás iha Timor-Leste.

Durante serimonia, bazeia dekretu Prezidente Repúblika fó mós medalha kondekorasaun ba Administrador Munisipiu Aileu no munisipiu Ainaru, ofisial Polisia no F-FDTL, Advisor Polisia husi Portugal no Australia, tamba durante ne’e halo kolaborasaun diak hodi asegura seguransa iha rai laran.

Alende ne’e promove mós membru PNTL nain tolu kompostu feto ida no mane rua.

Partisipa serimonia aniversariu PNTL ba dala 19, Primeiru Ministru, S.Exa. Taur Matan Ruak no membru Governu balun, Prezidente Parlamentu Nasional, S.Exa. Arao Noe, Prezidente Tribunal Rekursu, S.Exa. Deolindo do santos, Maijor Jeneral F-FDTL Lere Anan Timur, Komandante Polisia husi Munisipiu sira, Embaixadores sira iha Timor-Leste, reprezentate Polisia SATGAS PAMTAS RI, Sosiedade Sivil sira.