Comissão da Função Pública

Komisaun Funsaun Públika simu vizitas professor nain tolu husi Universidade Japaun hodi partilla informasaun kona-ba ezistensia Komisaun Funsaun Públika ho ninia papel importante iha Estadu ida, no aprezenta mós Komisaun IV mandatu nian ba prioridade sira ne’ebé iha.

Alende ne’e Prezidente KFP introduz mós KFP ninia involvimentu ba iha programa JDS nian hamtuk ho INAP, MESSK iha bolsa estudu sira ne’ebé mak sai mós komité nasionál ba bolsa JDS ninian.

Prezidente KFP esplika, KFP nafatin iha komitmentu atu servisu hamutuk ho Governu Japaun liu husi programa JDS bolsa estudu ba funsionárius públiku sira ho objetivu ida atu kontinua hasa’e koñesimentu no kapasidade pessoal no hodi hatan ba servisu institusionál nian.

Professores sira mós iha komitmentu hodi kontinua apoiu ba KFP ho haree ba asuntu refere hodi kontribui no hasa’e kapasidade rekursu umanus hodi hatan ba servisu institusionál.

Iha enkontru vizita ne’e partilla ideia di’ak sira liga ho programa reforma, formasaun no kapasitasaun ba rekursu umanus hodi kombina sistema di’ak sira hodi hadia administrasaun públika ba oin.

Enkontru ne’e prezensa husi Prezidente no Komisárius sira, Sekretária Ezekutiva, Professor konvidadu husi universidade Japaun hanesan prof. Usui Norio iha area maior dezenvolvimentu iha diversifikasaun ekonomia ho konsolidasaun fiskal husi universidade Japaun (IUJ), prof. Saijo Harunobu husi universidade Hirosima, prof. Kume Tetsuji husi universidade Gifu iha area sustentabilidade teknolojia investigasaun.

Hafoin enkontru komisaun kontinua dirije ba halo vizitas iha diresaun sira hanesan Unidade sira, diresaun sira hodi haree direta dadus no sistema SIGAP ne’ebé dezenvolve husi timoroan sira no funsionárius públiku sira.

Enkontru ne’e hala’o horseik iha segunda feira, (26/02/2024) iha sala reuniaun KFP, Matadouro, Díli.