Comissão da Função Pública

Rekursus Umanus Parlamentu Nasionál, ÍNDIMO ho Diretor Nasional Planeamentu Kuadru Pessoal Funsaun Públika Segunda-feira 20/01/2025 halo enkontru iha Parlamentu Nasional ho objetivu hodi ko’alia kona-ba funsionárius públikus nain 11 ne’ebé enfrenta difikuldade ne’ebé labele partisipa ezame promosaun maske sira servisu ona durante tinan 20 resin.

Problema ne’e aprezenta husi Diretora Rekursus Umanus, Ligia Carla ba instituisaun rua ne’e oinsá atu fasilita funsionáriu sira hodi hetan sertifikadu ruma ekivalênsia ho Diploma 1 ka 2 ka Lisensiatura hodi fasilita funsionáriu hirak ne’e tanba sira mai ho Diploma Sekundária.

Tuir Diretora RH, ida ne’e hanesan meius ida, oinsá buka dalan ba funsionárius hirak ne’e, tanba sira ne’e hanesan tékniku professional ne’ebé maka durante ne’e sira labele hetan promosaun no labele hasa’e sira nis grau.

Xefe Divizaun Dezenvolvimentu Rekursus Umanus PN katak, sira nain 11 ne’e servisu espasífiku liu maibé Lei maka lá fó dalan ba sira hodi partisipa iha iha ezame promosaun tanba sira iha de’it diploma sekundária tanba, ne’e oinsá buka dalan hodi ajuda sira hetan sertifikadu ne’ebé ekivalênsia ho Diploma ka Lisensiatura hodi fasilita sira.

Hafoin aprezentasaun husi Diretora RH, Diretora Ezekutiva INDIMO, Isabel Fernandes de Lima hateten, atu fó rekoñesimentu husi INDIMO presiza Instituisaun Públiku sira mós iha posibilidade submete hamutuk ho INDIMO ho rekerimentu sira ne’ebé prepara ona.

Enkuantu Diretor Nasional Planeamentu Kuadru Pessoal Funsaun Públika Sekretariadu KFP, Francisco da Costa Pereira katak, Komisaun nia reprezenta iha ne’e konsidera formasaun hanesan bai-bain tuir nia kritériu sira, ne’ebé iha no presiza halo buat ne’ebé loos ho kredível no ema hotu-hotu presiza prenxe kritérius ba formasaun.

Tuir ideia Diretor Francisco karik, INDIMO bele haree mekanizmu ka kritérius ruma ba formasaun fulan 6 bele hetan diploma 1 ka 2, posibilidade maka Parlamentu Nasional bele hasai Rezolusaun ruma hodi fasilita funsionárius Parlamentu nian.