Comissão da Função Pública

Tempu adventu nu’udar oportunidade atu ema sarani no hanesan sidadaun halo reflesaun hodi haree ba hahalok servisu ba tinan tomak nian, hodi identifika susesu defikuldade, frakeza no oportunidade, atu bele tulun hodi hala’o planu aktividade sira iha tinan tuir mai ba servisu atendimentu públiku nian, Padre Rui Pereira parokia Maubara hateten liafuan ne’e kinta feira kalan, (21/12/2023) wainhira halo reflesaun ho funsionariu sekretaridu Komisaun Funsaun Públika iha salaun padres paroquia Maubara Munisípiu Liquica.

Padre Rui Pereira subliña liga ba tema Natal 2023 ba fortalese prestasaun servisu Administrasaun Públika ho efikaz, efisiente, inovativu no responsavel” nu’udar mehi ida ne’ebé aas, maibé ezije funsionariu ida-idak nian vontade, fidelidade no konsiensia di’ak nian hodi kontribui ba atinji servisu ba atendimentu públiku ne’ebé di’ak liu. 

Tuir Padre Rui Pereira katak, atu atinji ba susesu servisu atendimentu públiku, presiza konsidera servisu fatin sai hanesan prinsipiu família Nazaré, kuda kbiit hamutuk forsa ida forte atu bele alkansa objetividade ba atendimentu públiku nian. Servisu fatin sai mós hanesan prezepiu ida ne’ebé harii iha tempu Natal hodi fó naroman no ksolok ba ema hotu hodi hametin kompromisu nu’udar servidor ba públiku nasaun no povu Timor-Leste ba moris saudavel.

Aktividade reflesaun ensera ho konfisaun ba funsionariu sira no kontinua ho jantar konfraternizasaun konta ho partisipasaun Prezidente no Komisariu KFP, Sekretaria Ezekutiva, Kargu diresaun no xefias hamutuk ho funsionariu sira.