Comissão da Função Pública

11 Dezembru 2023, Ministru Planeamentu Investimentu Estrategiku (MPIE) Gastão de Sousa ho nia komitiva mai vizita Komisaun Funsaun Públika no hala’o enkontru ho Prezidente no Komisárius KFP iha Gabinete Prezidente KFP, Matadouro, Díli hodi ko’alia asuntu jestaun rekursu umanus no toka mós asuntu funsionárius kontratadus iha ministériu nian.

Ministru MPIE apresia no agradese ba Prezidente no Komisárius sira ne’ebé simu nia ho di’ak.

Ministru MPIE, Gastão de Sousa toka asuntu kona-ba funsionárius kontratadu ho termu sertu, kazuais no kargus diresaun no xefias, rekrutamentu, formasaun ne’ebé mak sei koordena ho INAP no FDCH atu eleva kapasidade funsionáriu públiku ministériu nian.

Iha tempu hanesan Prezidente Komisaun Funsaun Públika, Agostinho Letêncio de Deus hateten, iha IV mandatu KFP agradese iha primeira vizita eselénsia mai iha KFP, ne’ebé mak Komisaun mós iha hanoin ida atu vizita ba iha kada ministériu ho hanoin ida Funsaun Públika parseria ho Governu, tanba ne’e krítika hotu ne’ebé Governu atu lori, ba oin KFP sei hola parte ida iha jestaun rekursu umanus ninian hodi haree ba asuntu importante ida ne’e.

Alende ne’e diskute mós pontus importante mak presiza altera dekretu lei númeru 25/2016 kona-ba rejime kargus diresaun no xefias ninian iha artigu 18-19, ne’e’bé ko’alia kona-ba grau mínimu ba asume kargu sira iha diretor jeral ka ekiparadu ne’ebé mak tau importansia liu ba iha esperiensia.

 Durante enkontru parte rua kontinua atu maksimiza servisu sira liga ho jestaun rekursu umanus ba oin.