Comissão da Função Pública

22 Dezembru 2021, Komisaun Funsaun Públika organiza enkontru ho nivél diretores jerais, inspetores liñas ministeriais, instituisaun utónomu sira, prezidente autoridade no administrador munisipal sira ho objetivu atu halo balansu ba iha dezempeñu servisu Funsaun Públika iha nivél ministerial no munisipal sira.

Asuntu prinsipal ida seluk mak oinsá atu haree lisuk jestaun rekursu umanus ninia implementasaun sira iha nivél liñas ministeriais no mós ho instituisaun públiku sira atu hare ganhos, konkistas, susesu, partilla kona-ba dezafiu no obstakulu sira ne’ebé mak iha, aproveita hato’o sujestaun sira ne’ebé mak nesesariu atu hodi hadia liu tan iha tempu oin mai, esplika Prezidente KFP.

Haree ba dezafiu sira liga ho jestaun rekursu umanus ne’ebé abranjente tebes hahú ho planeamentu forsa traballu, rekrutamentu, kolokasaun, nomeasaun kargus diresaun xefia, promosaun, seleksaun púr méritu, kestaun liga ho subsidius, salárius, kestaun seluk liga ho formasaun, bolsa estudu, reforma no pensaun ninian ba kestaun sira ne’ebé mak foti liga ho áreas jestaun rekursu umanus sira nian, esklarese, Prezidente KFP, Faustino Cardoso Gomes iha salaun enkontru Ministériu Finansas, Aitarak Laran, Díli.

Alende ne’e iha mós aprezentasaun prioridade sira Komisaun Funsaun Públika nian ba tinan lima nian no preokupasaun sira ne’ebé mak iha kobre ona iha planu estratéjiku KFP nian liu husi outcome sira ne’ebé mak levanta.

Kestaun sira ne’ebé destaka iha enkontru ne’e tama ona vizaun, misaun no planu estratéjiku KFP nian, maibé haree mós ba fator kontribuintes implementasaun mak barak tebes mak polítika, mudansa governamental, mudansa prioridade, vontade polítika, vizaun koerente, konsistente ba kestaun sira estruturante. Tanba ne’e Prezidente KFP alerta mós ba dirijentes sira atu hamosu planu estratejiku iha âmbitu jestaun rekursu umanus nian pelu menus buka harmoniza mós ba planu prioridade sira ne’ebé dezenvolve ona husi KFP.

Ita buka hamutuk oinsá atu realiza mehi sira ne’ebé mak la’o hela daudaun, halo Funsaun Públika Timor-Leste ezemplar no sai mós referensia prinsipal iha mundu, tantu nivél rejional nune’e mós nivél global.