Comissão da Função Pública

Estatutu Funsaun Públika depois hetan autorizasaun husi Parlamentu ho lei númeru 7/2024, no halo alterasaun ba estatutu funsaun públika ho dekretu lei númeru 9/2025 fó ona dalan atu funsionáriu sira ne’ebé mak atinje ona 65 anos atu reforma. Lei ne’e foin daudaun promulga ona husi Prezidente Repúblika no tuir planu sei implementa iha tinan 2026, esplika Prezidente KFP, Agostinho Letêncio de Deus, iha segunda-feira, (02/06/2025) iha KFP.

Prezidente KFP ne’e epslika, funsionárius ne’ebé tama ona ba idade 65 anos tama ona ba Reforma Obrigatóriu. Agora daudaun baze ba lista ne’ebé mak ita iha, kuaze 2 mil resin maioria mai husi professores sira, alende númeru ne’ebé mak baze ba tinan, iha mós lista ne’ebé mak moras prolongada “moras tinan naruk” sira ne’e mós ita enkoraja sira atu tama ba prosesu reforma.

Komisaun Funsaun Públika sei servisu hamutuk ho Institutu Nasionál Seguransa Sosial (INSS) atu bele atende no kobre ba sira direitu sira molok ba reforma.

“Ita sei ko’alia hamutuk ho INSS  atu bele akompaña, kobre sira nia pensaun nian, ami hanoin ne’e dalan ne’ebé di’ak, atu ita hahú prepara fali joven sira hodi tama ba funsionáriu públiku.” dehan Autoridade Funsaun Públika.

Tuir dadus Sistema Informasaun Jestaun Administrasaun Públika (SIGAP FOUN) extrai dadus ne’ebé atu tama ba reforma iha tinan 2026 hamutuk 2,131, feto 630, no mane 1,501 mai husi 63 instituisoens. Husi númerus ne’ebé atu ba reforma husi Ministériu Edukasaun mak númerus boot liu 1,456 no tuir instituisaun sira seluk iha rejime jeral no rejime espesial.