Comissão da Função Pública

Tersa-feira, 03 Juñu 2025 – Prezidente, Komisarius Komisaun Funsaun Públika akompaña husi Sekretária Ezekutiva no ekiparadus diretores SKFP sira hala’o aprezentasaun relatóriu anual KFP 2024 ho tema “Reforma Administração Pública, Melhora Prestação do Estado” nian iha plenária Parlamentu Nasional.

Pontu prinsipál alkansu sira mak KFP Mandatu IV realiza hahú kedas hosi alokasaun orsamentu no ninia ezekusaun jerál ba iha ano fiskál 2024 ho totál $3,048,399,00, ne’ebe distribui ba kategória tolu hanesan Saláriu no vensimentu ho montante: $2,127,049.00, Beins no servisus ho totál $918,350.00 no Transferênsias públikas ho totál $3,000.00 aprezenta husi Prezidente KFP Agostinho Letêncio de Deus iha Plenária.

Baze dadus SIGAP FOUN KFP 2024 rejista funsionárius permanentes inklui ajente administrasaun públika (AAP) ativu ho totál  39,236 ho kompozisaun feto 36% eh 14,281 no Mane 64% eh 24,955. Hosi númeru totál refere, funsionáriu permanente ho total 34,928 eh 89% no AAP ho totál 4,308 eh 11%. Iha rejime kareira prinsipál rua mak hanesan, Rejime jerál ho totál 17,600 eh 45% no rejime espesial ho forsa traballu hamutuk 21,636 eh 55%. Ba kargu Diresaun no Xefia nian to’o tinan 2024 nia rohan, haktuir ba atualizasaun dadus iha SIGAP FOUN hatudu katak, númeru okupante kargu diresaun no xefia husi rejime jerál no rejime espesiál iha Administrasaun Públika ho totál: 5,059 ne’ebe kompostu husi feto hamutuk 1,248 (25%) no mane 3,811 (75%).

Relativa ba estrutura etária (idade nian), bazeia forsa traballu totál ativu (39,236), persentajem boot liu mak pessoál ho idade 34-49 (52%), 50-57 (24%) no identifika mos katak funsionariu ho idade entre 58-90 iha 16% eh ho total 6,172 pessoas. Atualiza mos katak (ho implementasaun lei idade obrigatoriu ba reforma, identifika katak iha janeiru 2026, funsionariu hamutuk 2,131 (F:630 no M:1,501) mak obrigatoriamente sei tama ba reforma.

KFP rejista, iha tinan 2024 konsege realiza ninia prioridades sira polítika Mandatu IV nian no alkansus mak ligada mos ba servisu korente sira hanesan define Planu tinan 5 hanaran Planu Reforma Jestaun Rekursus Umanus Administrasaun Públika 2023-2028, Promosaun Rejime Jerál ba daneen 817 (F:274 M:543) hosi instituisaun Estadu 75 no implementasaun ba dahuluk atividade promosaun pilotu hala’o iha RAEOA ba kandidatu ho totál 364, realiza diagnóstika forsa traballu ba Munisípiu 7 no instituisaun 6, aprovasaun autorizasaun lejislativa hosi Parlamento Nasionál liga ba proposta lejislativa Limite Idade ba Reforma iha Funsaun Públika, dezenvolve ona módulo 38 hosi módulo 47 ba Sistema SIGAP FOUN, diseminasaun, formasaun, rekrutamentu, vizita surpreza, partisipasaun KFP nian iha ASEAN no seluk tan.

Alende ne’e susesu ida mak teste bolsa kandidatus ba manorin nain sira entre KFP hamutuk ho Ministériu Edukasaun ba primeira faze ba grupu Pré Eskolar no Ensino Báziku siklu 1^o no 2^o ho total vagas 2.400 no segunda faze destinadu ba Ensinu Báziku siklu 1^o no 2^o ho nia total vaga hamutuk 2.500. Husi prosesu rekrutamentu ba bolsa kandidatura kandidatus klasifikadu ho valor 60 ba leten hamutuk 3,010 (F: 1,868 no M: 1,142).

Remata aprezentasaun husi prezidente KFP iha sesaun pergunta, sujestaun no rekomendasaun sira husi deputadu sira kona-ba servisu KFP nian hodi mellora liu tan servisu sira iha tinan tuir mai.