Comissão da Função Pública

386 funsionárius Ministeriu Saúde nia laiha avaliasaun dezempeñu hahú husi tinan 2013 to’o mai iha tinan 2022.

Numeru refere detekta husi sistema foun ne’ebé ekipa teknika hetan iha tinan ida ne’e, ne’ebé aprezenta husi Diretor Baze dadus Funsaun Públika, Moises Almeida Sousa Pedroso, durante enkontru entre Komisaun Funsaun Públika, Komisarius sira no Ministra Saúde, Odete Maria Freitas Belo iha Segunda- feira, 26 setembru tinan ne’e.

Ho razaun ne’e maka KFP konvida Ministra Saúde atu trata ho dignu no oinsá rezolve, ajusta fila fali 386 funsionáriu profisionais saúde sira nia direitu hahú husi 2013 to’o agora.

Durante aprezentasaun Diretor Moises Pedroso, husu ba Ministra Saúde liu husi Rekursus Umanus atu hadia 386 funsionarius profisionais saúde nia avaliasaun dezempeñu hodi submete mai iha ekipa téknika Sekretariadu Komisaun Funsaun Públika liu husi diresaun sira ne’ebé responsavel ba asuntu hirak ne’e ho Rekursus Umanus Saúde nian atu nune’’e bele atualiza ba iha SIGAP Foun KFP nian.

Iha oportunidade hanesan Ministra Saúde, Odete Maria Freitas Belo, agradese ba progresu identifikasaun husi ekipa téknika no rekoñese katak, laiha koñesimentu sistema sira ne’e.

Governante ne’e adianta, tuir loloos pessoais saúde mós presiza tau atensaun ba sira nia dokumentus sira, tanba importante ida mós hodi responde ba sira nia nesesidade rasik iha futuru hanesan dokumentus privadu.

Iha tempu hanesan Prezidente Komisaun Funsaun Públika, Faustino Cardoso Gomes subliña, liu husi sistema ne’e atu alerta ba Interligadu sira hodi halo análize kona-ba situasaun ne’e, tanba médiku jeral sira la hatama sira nia dokumentus sira.