Comissão da Função Pública

Komisaun Funsaun Públika enkontru ho Komisaun Anti Korupsaun, Inspetoria Jeral Estadu, PNTL no Diresaun Jeral Jestaun Patrimoniu Estadu-Ministériu Finansas ko’alia kona-ba preparasaun no no sirkulasaun ba utilizasaun veíkulu estadu durante vizita Santu Padre Francisco iha Timor-Leste iha setembru ne’e.

Ligadu ba papél patrimoniu Estadu Diretora Jeral hateten, bazeia ba karta ne’ebé Ministériu Adminsitrasaun Estatal hato’o ba uzu veíkulu Estadu ne’ebé mak utiliza ba iha eventu durante Santu Padre ninia vizita mai Timor-Leste mak iha kareta hamutuk 17, seidauk inklui instituisaun estadu sira seluk. Nune’e liga ho dekretu lei númeru 80/2022, kona-ba ekipa fiskalizasaun konjunta ne’ebé mak ninia funsaun sira atu halo fiskalizasaun ba veíkulu estadu sira ne’ebé baze ba kompeténsia ida-idak ninian servisu.

Alende ne’e ko’alia mós kona-ba kareta frota nasional no veíkulu sira ne’e sei regula tuir programa monitorizasaun, fiskalizasaun no check point tuir kalendáriu ne’ebé iha ba iha uzu veíkulu Estadu ninian, adianta Diretora Jeral.

Enkuantu Inspetor Jeral Estadu, Francisco Carvalho hateten, veíkulu sira ne’ebé maka sei halo sikulasaun durante vizita Santu Padre iha Timor-Leste presiza rejista no alista didiak tuir autorizasaun no tutela ba parte kompetente, se lae parte seluk bele aproveita oportunidade.

Iha oportunidade Diretor Jerak KAK subliña  katak, utilizasaun veikulu Estadu presiza alista loloos hodi kontrola kombustível ba veíkulu Estadu sira, durante vizita Santu Padre.

Prezidente Komisaun Funsaun Públika, Agostinho Leténcio de Deus katak, ekipa refere sei halo karta ba koordenador altu nível no desizaun seluk ka asuntu refere sei kontinua ba enkontru tuir mai.

No iha oportunidade ne’e Komandante Polísia Tranzitu, Carlos Mali Berek prontu servisu tuir desizaun konjunta no sei kontinua monitoriza veíkulu estadu sira ne’ebé sikula no haree mós ba iha futuru.

Enkontru ne’e hala’o iha kuarta-feira, (10/07/2024), iha KFP, Matadouro, Díli.