Institutu Nasional Dezenvolvimentu Mão de Obra (INDMO) hasoru malu ho Prezidente KFP, hodi diskute kona-ba estabelesimentu ekipa task force konjunta ida hodi tulun institutu rua iha promosaun no hametin sistema formasaun profisional iha Timor-Leste, inklui programa sertifikasaun kompetensia ba kuadru Funsaun Públika Timor-Leste nian, informasaun ne’e aprezenta husi Diretora INDMO Isabel Fernandes de Lima durante enkontru ho Prezidente Komisaun Funsaun Públika iha KFP, Matadouro, iha Tersa-feira 09 fulan Jullu 2024.

Tuir Diretora de Lima atualiza mós informasaun ligadu ba iha Kompetissaun Internasional iha Timor-Leste iha tempu kurtu ba Mão de Obra ne’ebé maka Timor Oan sira aprende liu husi Sentru Formasaun durante ne’ebé kompetisaun ne’e haree ba abilidades hanesan restaurant services no sei partisipa husi Austrália ho Timor-Leste no nasaun seluk tan no juri mai husi nasaun rua  iha fulan novembru,  inklui mós kompetisaun iha nível nasional liu-liu iha área konstrusaun, eletríkal no soldadura. Alende ne’e, Diretora Isabel de Lima informa mós kona-ba armonizasaun kualifikasaun Internasional, vizita Internasional foin lalais ne’e oinsá atu aplika iha sentru formasaun sira, enkontru Órgaun Reguladora Australia nian, validasaun ba sentru sira no seluk tan.

KFP rekonese katak, programa sertifikasaun kompeténsia kandidatu funsionárius públikus no ajentes administasaun públika ba formasaun téknika no profisional ba funsionárius atual, no formasaun adisional formasaun ruma ba funsionárius públikus ne’ebé molok ba reforma, hanesan parte ida husi programa reforma administrasaun públika nu’udar prioridade Governu Konstitusional dasia no KFP mandatu daha’at nian.

Entre KFP no INDMO sei aborda kona-ba oinsá atu prepara padraun kompeténsia no partilla ba malu lista sentru formasaun akreditadu ne’ebé sai tarjetu fatin ba kuadru funsaun públika Timor-Leste nian sira atu mellora sira kapasidade téknika no espesializasaun. Atu termina parte rua kondorda katak, sei hasoru malu fali hodi diskuti téknika implementasaun ba projetu ne’e.

Prezidente Komisaun Funsaun Públika, Agostinho Letêncio de Deus apresia ba eventu interonasional ne’ebé sita maibé, husu ba INDMO atu fó mós formasaun ba 36 mil funsionáriu sira ne’ebé maka seidauk hetan oportunidade no rekoñese katak durante ne’e apenas fó ona formasaun ba 2 mil funsionárius no kargus Xefia maibé, maioria seidauk hetan formasaun, tanba ne’e husu ba INDIMO hodi abranje formassaun ba área mais téknika iha futuru liu husi kooperasaun entre KFP, INAP ho INDMO, tanba durante ne’e KFP apenas rekruta de’it, infelizmente lá tuir ninia abilidade.