Comissão da Função Pública

Governu Timor-Leste sei promove grau ba funsionárius por antiguidade.

Komisáriu ho portefóliu Forsa Traballu Komisaun Funsaun Públika, José Telo Soares Cristovão, iha Kinta-feira, 28 Marsu liu husi transmisaun direta Kanal TVE iha Timor Plaza, hatete IX Governu liu husi promosaun ba sira nia kareira ho nune’e Komisaun Funsaun Públika IV mandatu mai ho nia polítika prioridade hodi hamosu Dekretu Lei kona-ba promosaun tuir antiguidade ne’ebé mak hetan ona aprovasaun husi Konsellu Ministru ho Dekretu Lei no. 46/2024 de 23 dezembru no mós rezolusaun Governu nú. 12/2025 de 3 de marsu kona-ba fixasaun vagas ba promosaun tuir antiguidade. Bazeia ba Dekretu Lei no Rezolusaun Governu ne’ebé mak iha Komisaun Funsaun Públika hasai mós Deliberasaun nú. 399/2025/CFP kona-ba interpretasaun pontus kritériu sira ba promosaun tuir Antiguidade.

Komisáriu José Telo Soares Cristovão iha entrevista adianta, KFP tenke fó prioridade ba funsionárius públikus por antiguidade tanba, sira nunka hasa’e sira nia grau liu husi ezame promosaun hahú husi 2019 to’o agora mais de 5 mil funsionárius laliu ezame promosaun, enkuantu 70 to’o 80 por sentu nunka liu ezame promosaun.

Tuir Komisáriu, ne’e oportunidade fantástiku maibé, sei tuir kritérius oi-oin ne’ebé estabelesidu husi KFP mak hanesan tuir mai ne’e: tuir nia grau prestasaun servisu, avaliasaun dezempeñu, sertifikadu formasoens, antiguidade kareiras no sura husi grau ikus.

Total funsionárius ne’ebé maka atu hetan promosaun por antiguidade maka 70 to’o 80 pursentu, tuir Dekretu Lei Nú. 46/2024, 23 dezembru, kona-ba promosaun ba antiguidade iha rejime kareira administrasaun públika, hanesan baze fundamentu nune’e mós ho nia kritérius sira.

Programa ne’e realiza ein kolaborasaun entre KFP no TV Edukasaun Timor iha programa Fokus Dader hodi ko’alia kona-ba Promosaun Antiguidade ba Funsionárius Públikus Ne’ebé Nunka Promovidu ba Grau.