Comissão da Função Pública

Sexta feira loron 28 fulan jullu tinan 2023, Presidente Komisaun  Funsaun Publika Faustino Cardoso Gomes no Komisaria Maria de Jesus Sarmento, Comisaria  portofolio ba Financas, Base de Dadus, Pensaun no Reforma, Protokolo no Komunikasaun Sosial, hala’o enkontru ho Ministru Agrikultura Peskas, Pekuaria no Floresta-MAPPF ho nia Vice nain rua mak hanesan Domingos da Conceicao dos Santos no Jose Viera de Araujo, hamutuk ho Diretores Geral  no Diretures Nasional sira, inklui asesor sira iha salaun MAPPF Comoro Dili.

Enkontru refere hala’o atu hodi rona informasaun husi Presidente Komisaun  Funsaun Publika ba ligadu ho jestaun Rekursus Humanus iha Funsaun Publika.    

Enkontru ne’e hala’o hodi hetan esplikasaun ne’ebe klean, antes atu troka estrutura Organik Foun Ministeriu Agrikultura, Peskas, Pekuaria no Florestas kona ba funsionariu sira ne’ebe mak atu remata sira nia kontratu hanesan  kajuais no seluk tan, iha Ministeriu refere.

Iha enkotru ne’e Ministru agradese Presidante  ho Komisaria sira nia prezensa, hodi bele fo infomasaun ruma ba Ministeriu ne’e, liu–liu kona ba Lei Funsaun Publika, tamba iha kestaun balu ne’ebe mak persiza rona mos  hanoin husi Presidente Komisaun Funsau Publika relasiona  ho funsionariu Agrikultura hamutuk mil nove sentus resin, husi total ne’e oito sentus resin mak kontratadus, Funsionariu Permanente kuaze iha deit seis sentus hanesan ne’e, inklui mos kontratu kazuais.

Iha tempu hanesan Presidente Komisaun  Funsaun Publika  Faustino Cardoso Gomes hateten, momentu sira hanesan ne’e KFP preve tiha ona antes atu hatene rezultadu eleisaun, tamba KFP iha tiha ona esperiensia hasoru tranzisaun governamental sira hanesan ne’e, nu’udar programa ida prioridade, atu ba to’o ministeriu sira hodi esklarese kona-ba situsaun sira hanesan Ministeriu ne’e nian, no foin primeira ves maka MAPPF komvida ami atu halo esplikasaun ba asuntu refere, ne’e inisiativa diak.

Presidente hatutan tan katak, assuntu sira ohin ne’e pertinente teb-tebes, maibe assuntu ida mais importante maka kona-ba estrutura orgánika ne’e rasik, tamba estrutura orgánika IX Governu Konstitusional ne’e iha ona, ho baze ba ida ne’e, fila hikas ba Ministeriu ida-idak atu avansa liu tan hodi konsolida ninia estrutura organika, konforme politika no mandatu ne’ebe mak define ona. Presidente sublinha liu tan, KFP entende katak Ministeriu Agrikultura, Peskas, Pekuaria no Floresta presiza duni halo restruturasaun ho rasionalizasaun ba ninia estrutura organika, aumezmu tempu atu priense estrutura organika ne’ebe mak atualizada, konforme politika foun IX Governu Konstitusional nian,  ne’e prinsipiu fundamental.