Comissão da Função Pública

Kinta feira loron 27 fulan jullu 2023 ne’e, Presidente Autoridade Portuáriu Timor-Leste-APORTIL Feliciano da C. Correia halo konsultasaun ho Presidente Komisaun Funsaun Públika-KFP Faustino Cardoso Gomes konaba Prosesu Selesaun Por Meritu ba Kargu iha APORTIL ne’ebe pendente hela, relasiona ho suspensaun prosesu selesaun sira ne’ebe KFP hasai, hodi hein Governasaun foun.

“Ami na’in hira mai husu orientasaun ba Sua Escelensia hanesan naín ba Funsaun Publiku ligadu ho ami nia kargu chefia tolu ne’ebe liu ba sira tuir tiha ona selesaun por meritu, prosesu ne’e lao tiha ona, atu prosesu sira ne’e lao diak tuir regra funsaun públika ninian no lori Intituisaun lao ba oin nafatin”.

Hatan ba asuntu ne’e, Presidente KFP orienta Dirijente APORTIL ne’e atu kontinua prosesu ne’e ho ekipa juri ne’ebe iha ona, no tenke informa prosesu selesaun sira ne’e ba Sua Esxelensia Ministru Transportes no Komunikasaun, atu informadu ho prosesu refere, nune’e bele hetan autorizasaun hodi bele kontinua finaliza prosesu selesaun ne’e.

“Konaba vaga kargu na’in tolu nian ne’e, ekipa juri nain tolu, rua husi APORTIL no ida husi KFP, iha responsabilidade ba iha prosesu ne’e, no lao ona tuir prosedimentu legal ne’ebe maka iha, maibe tamba ita iha periodu politiku nian, eleisaun, entaun iha momentu ida KFP hasai Sirkular atu suspende tiha atividade sira ligadu ho rekrutamentu, nomeiasoens, solisitasoens, halo konversoens husi kazuais ba Ajente Administrasaun Publika, tamba iha periudu sira hensan ne’e la dun favoravel. Agora ita hanoin kontinuasaun ba oin, ekipa painel juri tenke nafatin, importante lideransa ne’eba, nia atu reativa fali, hodi kontinua fali prosesu ne’e. Segundu mais importante, dividu husi tranzisaun Governo atu imi atualiza ba iha sua escelensia Ministru konaba situasaun ida ne’e. Maske imi iha estatutu rasik maibe hau entende katak iha mos tutela ne’ebe presiza atu informadu, atualizadu konaba situasaun ida ne’e, tamba foun ka lae, ne’ebe imi atualiza didiak ba nia ne’e importante. Dehan, ami enkontru ona ho KFP hodi prosede oinsa bele kontinua fila fali prosesu ne’e”.            Enkontru ne’e lideradu husi Presidente KFP Faustino Cardoso Gomes, partisipa husi Presidente APORTIL Feliciano da C. Correia ho nia Ekipa, membru Juri sira ho Diretora Rekrutamentu no Promosaun KFP Marcelina Irene Mesquita.