Comissão da Função Pública

Segunda Feira 07 de Julho 2025, Prezidente Komisaun Funsaun Públika no Komisária ne’ebé responsavel ba asuntu dezenvolvimentu kareira espesializada no akompaña husi diretores no xefes departamentu halo enkontru ho Ministra Saúde atu hare kona-ba reajustamentu kareira ba profisionais saúde.

Iha enkontru ne’e Ministra Saúde, Elia A. A. dos Reis Amaral agradese ba KFP no ekipa tomak ne’ebé mak durante ne’e apoiu ba iha parte servisu Rekursu Umanu nian, atu nune’e bele haree hamutuk ba rezultadu ne’ebé mak durante ne’e la’o.

Iha tempu  hanesan Prezidente Komisaun Funsaun Públika, Agostinho Letêncio de Deus hateten, Komisaun iha ne’e atu deskuti kona-ba servisu sira iha ministériu saúde, no atu haree ba funsionáriu sira hanesan Médiku ho Emfermeiru no Parteira sira atu halo reajustamentu ba sira nia kareira. Tamba iha doutor lubuk ida ne’ebe mak sei kontinua hela iha nivel mediku jeral nian no balun sei kontinua iha espesialista junior. Entaun KFP mai ho Objetivu ida atu haree ba situasaun ida ne’e mak oinsá atu bele halo reajustamentu.

Prezidente mós aprezenta planu kareira ne’ebé IV mandate aprezenta liu husi kareira úniku eh kareira puru ne’ebé aprezenta ona ba Ministru Prezidensia Konsellu Ministru, haree ba ida ne’e saúde hanesan prioridade ida, oinsá atu diskute ba iha ajustamentu kareira espesial ninian.

Nune’e husi Komisária Anita Tavares Ribeiro de Jesus reafirma tan katak, durante ne’e servisu ne’ebé mak ekipa halo bazeia ba despacho husi Ministra Saúde ho Prezidente Komisaun Funsaun Públika ne’ebé forma ekipa hodi halo diskusaun no finalize ona diskusaun iha parte rua kona-ba dadus, no prepara proposta rezolusaun governu ba iha promosaun por antiguidade ba profisionais saúde sira, ne’ebe ida ne’e mak finaliza ona. No ekipa mai aprezenta ba Ministra Saúde no Prezidente KFP hodi haree haree wainhira iha ajustamentu eh mudansa ruma antes submete ba Konsellu Ministru .

Enkontru ne’e hala’o iha palásiu cinzas Caicoli, Ministériu Saúde, iha segunda-feira, (07/07/2025). #MCaet