Comissão da Função Pública

Komisáriu KFP ne’ebé responsavel ba portefóliu Forsa Traballu, José Telo Soares Cristóvão partisipa iha reuniaun koordenasaun ne’ebé organiza husi Autoridade Aduaneira, no servisus interligadus ba iha Karantina, Imigrasaun,  PNTL kona-ba mudansa orariu servisu Autoridade Aduaneira nian iha fronteira ba atendimentu sira iha segunda-feira, (28/07/2025), iha salaun Ministériu Finansas Kayrala Xanana Gusmão Aitarak laran.

Iha enkontru ne’e Komisáriu Autoridade Aduaneira, Joanico Pinto introduz, objetivu husi enkontru ne’e atu halo koordenasaun servisu ligadu ho mudansa orariu atendimentu iha postu Fronteira sira, no partikularmente iha postu Integradu Batugade, Salele, Sakato/Wini no Oesilo hanesan ho orariu definidu husi paíz viziñu Indonézia.

Relasiona ho reuniaun Konsellu Ministru ne’ebé hala’o iha 18 juñu 2025 aprova ona projetu rezolusaun Governu ne’ebé aprezenta husi Ministru Interior, Francisco da Costa Guterres, ba mudansa orariu ba funsionamentu postus fronteira sira entre Repúblika Demokratika Timor Leste no Repúblika Indonézia nian. Hodi reforsa kooperasaun entre paíz rua ne’e ba fasilita mobilidade zonas fronteira ninian hodi promove fluxu ema, no merkadoria sira no hametin “fortalese” lasus sosiais. Ho ida ne’e mak responde ba alterasaun ba proposta ne’ebé mai husi Autoridade Nasional Jestaun Fronteira Indonézia nian tuir prinsípiu sira nasaun viziñu rua. Baze ba desizaun nee postu fronteira sira hanesan Batugade, Salele, Sakato no Oesilu sei funsiona hikas ho orariu definidu 09h00 to’o 18h00, no pauza entre  oras 13h00 no 14h00, iha aliña ho orariu husi postu Indonéziu nian hanesan Motaain, Motamasin, Wini no Napan.

Iha oportunidade ida ne’e Komisáriu KFP, José Telo Soares Cristovão ne’ebé mak responsavel ba servisu portefóliu Forsa Traballu husu, nu’udar funsionáriu públiku servisu tuir lei estatutu funsaun públika. Bainhira iha ona lei tenke implementa, la iha atu deskuti, tamba ne’e regras Funsaun Públika nian heteten klaru ona katak, nu’udar funsionáriu públiku obrigatoriamente iha dever ba loron ida servisu oras walu (8) semana servisu ida oras (40). #MCaet