Comissão da Função Pública

Primeiru Ministru VIII Governu Konstitusional, S.E Taur Matan Ruak fó posse ba Komisáriu Komisaun Funsaun Públika (KFP) Fausto Freitas da Silva ne’ebé nomeia husi Parlamentu Nasional hodi kompleta estrutura III mandatu KFP nian.

Iha Primeiru Ministru Taur Matan Ruak nia diskursu hateten, Komisaun Funsaun Públika iha knaar importante hodi asume papel ida ne’e iha dezenvolvimentu Administrasaun Públika Timor-Leste. Iha esperensia tinan 11 buat barak mak halo ona no iha buat balun ne’ebé mak presija halo tan, tanba realmente torna ita nia funsionalizmu públiku iha Administrasaun Públika ne’ebé fokaliza liu ba prestasaun servisu ba ita nia sidadaun sira. Sidadaun sira mak halo avaliasaun ba performance, empeñamentu ba dedikasaun funsionáriu.

Hanesan Xefe Governu ne’e hateten, iha dezafiu boot mak governu hala’o reforma sira hanesan, reforma iha administrasaun públika, reforma legislasaun, reforma finansas públikas no reforma sira ne’ebé mak ita pretende atu halo, barak halo ona no barak seidauk. Tenke envolve ministériu lubuk ida ho responsabilidade ne’ebé mak lidera husi Primeiru Ministru, ida ne’e hornadu boot ida ba nia hodi halo reforma ba dezenvolvimentu instituisaun sira.

Governu haree area lima importante mak dezenvolvimentu institusional, imprime transforma sira ne’ebé efisiente, efikasia posivel, signifika ita hadook an husi ita nia burokrasia, formalidade ne’ebé impede dezenvolvimentu sidadaun sira nian, dada eh estimula partisipasaun sidadaun nia dezenvolvimentu. Seluk mak reforma legislasaun mak kria lei ne’ebé diak hodi dezenvolve ita, integra ita nia an iha rejiaun ne’ebé ita insere ba, lei ne’ebé labele loke dúvidas, ambiguidade no interpretasaun diferente, entaun governu nia esforsu kontinua tau matan atu simplifika liu tan legislasaun sira ne’ebé mak iha bele ajuda rezolve problema sosiedade ninian, fasilita ita la’o lais liu tan hodi atinje dezenvolvimentu ne’ebé mak ita hakarak, dehan S.Exa Primeiru Ministru Taur Matan Ruak.  

Iha Timor-Leste Administrasaun Públika hanesan orgaun administrativa antes ita ukun an ita iha administrasaun rua ne’ebé mak liu ona mak iha tempu kolonializmu Portugues no tempu Indonézia nian, entaun naturalmente iha ona entaun ita iha kompetensia no poder mós ba ita nia instituisaun sira iha postu, munisipiu sira tanba la iha dalan seluk atu halo maibé tenke implementa.

Primeiru Ministru mós kontinua fó esperansa no konfiansa tomak katak, iha dezenvolvimentu ne’ebé mak la’o daudaun liu-liu reforma sira ne’ebé mak KFP asume papel importante, liu-liu ho esperiensia barak mak lida permanente ho sistema, funsionalizmu iha Administrasaun Públika ne’ebé realístiku. Ho tomada de posse ne’e kompleta ekipa KFP nian liga Administrasaun Públika ne’ebé mak lidera husi prezidente ida no komisariu sira.

Prezidente KFP, Faustino Cardoso Gomes re-eleitu no nomeia husi Governu no rua seluk nomeia husi governu mak Komisaria Maria de Jesus Sarmento, Komisaria Carmeneza dos Santos Monteiro ne’ebé simu posse iha (28/05/2020) nune’e mós Komisariu Fausto Freitas da Silva nomeia husi Parlamentu Nasional posse iha (28/08/2020) no Komisariu Asuntu Disiplina KFP, António Freitas kontinua hetan extensaun too 2022.