Comissão da Função Pública

18 jullu 2024, Prezidente Komisaun Funsaun Públika, Agostinho Letêncio de Deus iha programa GMN – Dader Kmanek hodi partilla kona-ba rezultadu diagnóstika no planu reforma adminitrasaun públika, iha studiu GMN, Bebora, Díli.

Prezidente KFP introduz kona-ba diagnóstika iha funsaun públika no planu reforma KFP IV atu hala’o. Liga ho diagnóstiku prosesu ne’ebé organizasaun sira halo atu deteta, deskobre problema no situasaun ne’ebé eziste, nune’e iha IV mandatu KFP hetan orientasaun husi Primeiru-Ministru atu halo diagnóstiku ba instituisaun Estadu sira no hala’o auditoria ne’ebé KFP hala’o ona ba iha ministériu no ba munisípiu lima hodi foka ba problema prinsipal rekursu umanus iha administrasaun públika.

“Diagnóstiku ne’ebé ami halo foku ba iha forsa traballu, distribuisaun forsa traballu entre munisípiu ida ho munisípiu seluk no ministériu sira, inklui Institutu Públiku sira balun, foku ba kualidade akadémiku, kresimentu funsionáriu sira li-liu iha instituisaun indireta sira.” esplika Prezidente KFP.

Ein prinsipiu, hahú husi IX Governu Konstitusional mai ho programa reforma adminsitrasaun públika, atu responde ba reforma ne’e mak ita hala’o prosesu disgnóstiku atu hatan ba iha reforma administrasaun públika, hanesan atu hatene moras ida, presiza hatene moras saida atu bele fó aimoruk ho loloos, nune’e atu atinji duni ninia objetivu ba iha reforma. Prosesu ne’e hahú ho mekanizmu ne’ebé iha baze ba iha dadus, perguntas hodi foti informasaun ida klean haree ba iha total forsa traballu, grau akademiku, kresimentu iha instituisaun kada tinan hira ida ne’e mak presiza hatene, no foti mós dadus husi SIGAP atu halo analiza mós ba iha kresimentu funsionáriu husi nasionál ba to’o munisípiu ein jeral liga ho remunerasoens no dadus rekrusu umanus hodi análize ba komparasaun balansu forsa traballu no problema sira hateten, Prezidente KFP.

Haree mós iha rezultadu diagnóstiku ein termus forsa traballu, remunerasaun sira la iha balansu entre rejime espesial no rejime jeral, ezemplu haree ba nomeasaun kargus diresaun no xefias entre rejime rua ne’e iha rejime espesial ne’ebé ninia remunerasaun aas liu kompara ho rejime jeral. Haree mós katak, Iinstitutu Públiku kuaze 72 no sira ne’e hotu kontribui ba kresimentu forsa traballu, nivel saláriu mós aumenta ba bebeik, alende ne’e mós haree ba abilitasaun akadémiku nian, deteta mós antiguidade iha funsaun públika ne’ebé servisu kleur ona maibé iha mós 4 mil ital funsionárius ne’ebé nunka hetan promosaun, nune’e mós idade reforma, subliña nia.

Haree ba atendimentu públiku no prestasaun servisu ne’ebé iha, iha 93 pursentu muito bom, bom 7 pursentu de’it maibé, nota katak iha públiku atendimentu kontinua kestionadu, dehan Autoridade Funsaun Públika.

Enkuantu haree ba iha forsa traballu iha funsaun públika, ita seidauk define loloos forsa traballu ida adekuadu, oinsá atu jere hodi halo servisu no funsaun ruma “job description” la define ne’e problema ida, problema seluk mak kapasitasaun ba rekursu umanus ne’ebé mak atu responde ba kada grau no kada área seidauk bele kobre nesesidade kompeténsia iha kada grau no ministériu. Impaktu ba definisaun forsa traballu kuandu la define ho didiak ninia implikasaun sei ba orsamentu Estadu esplika, Prezidente KFP.

Alende ne’e Prezidente KFP mós esplika kona-ba planu reforma adminsitrasaun públika ne’ebé define 18 komponentes sai hanesan parte ida ba reforma administrasaun públika, no rezultadu diagnóstika ne’e mak sai baze ba iha reforma refere.