Comissão da Função Pública

29/04/2025, Kandidatus nain 792 konkore vagas 49 iha salaun Aikurus Binani, KFP ne’ebé ofisialmente loke husi Komisáriu Komisaun Funsaun Públika ba portefóliu forsa traballu, José Telo Soares Cristovão no Prezidente Juri husi Minitériu Administrasaun Estatal.

Iha abertura teste ne’e Komisariu KFP ba portefoliu forsa traballu José Telo Soares Cristovão hateten, imi mai hadau vaga 49, enkoraja ita boot sira lori ho família mai akomapaña iha li’ur, tanba imi teste tiha sai mai haree kedas imi nia rezultadu ne’ebé prense husi imi.

“Ohin ita boot sira tuir ona simulasaun, rezultadu saida mak iha ne’e, ita boot sira nia familia bele haree kedas iha liur. Teste ne’e méritu ba ajente administrasaun públika la’ós permanente, lalika mai ho persepsaun oioin, familiarizmu, vaga ne’e ema  iha ona, hakarak hatete katak, teste ne’e la haree ba kór, no vaga ne’e la’ós ba Ainaro oan de’it maibé, ba Timor oan tomak ne’ebé bele konkore hodi ba servisu iha Ainaro,‘‘ esplika Komisariu.

Komisariu mós enkoraja kandidatu sira atu le’e didiak, tanba ita boot sira se mak liu ne’e, sei sai autor prinsipal hodi servisu dezentralizasaun ne’ebè sei aplika iha Munisipiu.

“Ita boot sira sei funu durante 120 minutus, ne’ebé kada pergunta bele 4 minutus, husu atu lee didiak mak prense, tanba 30 to’o 40 pessoas hadau malu vaga ida. Ita boot sira ne’ebé atu prense ho didiak hodi sai hanesan funsionáriu, hodi servisu iha Munisípiu ba prosesu desentralizasaun,‘‘

Iha tempu hanesan Diretor Jeral ba Desentalizasaun- MAE no hanesan mós Prezidente Juri hateten, vaga loke ba públiku hodi responde ba ejizensia servisu munisípiu nian, tanba iha munisípiu sei menus rekursus umanus.

“Tanba saida mak prense vaga ajente administrasaun públika, tenki liu husi teste! atu evita ema nia interpretasaun dehan, estatal bolu ema tuir de’it nia hakarak. Ita boot sira prense vaga iha nivel autoridade nian servisu  22, servisu munisipais no servisu autonomu 8 bazeia ba avaliasaun, kondisaun ezistente, diretor servisu munisipal balun nain ida ou nain rua, funsionáriu apoiu tékniku laiha, tanba ne’e, vaga loke ba tékniku ne’ebé iha koñesimentu di’ak hodi responde ba autoridade sira nia nesesidade iha nivél munisípiu”, dehan Prezidente Juri.

Nia hatutan, Ajente Administrasaun Públika hamutuk ho Prezidente Autoridade Munisípiu presiza halo teste méritu iha KFP hodi evita familiarizmu no prepara funsionáriu ida ho kualidade hodi serví povu ida ne’e.

“Ajente Administrasaun públika ho funsionáriu públiku kapasitadu, treinadu, se de’it mak tinan 5 mai fali atu ukun, funsionáriu sira nafatin iha ne’ebá. Hanesan diretor jeral hau husu, ba PAM sira loke vaga ba ema hotu tenke teste iha KFP, atu tuir duni méritu atu evita krítika no konfrontativu polítiku sira, maibé tékniku labele sai hanesan fasilitador tanba ne’e, Timor oan se de’it mak liu, liu ona atu ba serví povu,‘‘ hatutan Nia.

Hanesan Prezidente Juri nia husu ba kandidatu sira karik liu, presiza tuir formasaun balun atu kapasita sira, koñesimentu di’ak hodi servisu iha munisipiu, no introduz karaktér pesoál ba karaktár instituisaun Estadu nian.

Entretantu, aplikasaun ba vaga ne’e aplikantes 945 kompostu husi feto 475 no mane 470, hafoin avaliasaun dokumentus iha aplikantes nain 153, feto nain 61 no mane 92 mak exkluidu, no kandidatus nain 792, kompostu husi feto 413 (52%) no mane 379 (48%) partisipa iha teste eskrita.