Comissão da Função Pública

Prezidente no Komisárius Komisaun Funsaun Públika akompaña husi Sekretária Ezekutiva no ekipa tékniku sira reuniaun ho Ministra Finansas hodi diskute kona-ba reforma Funsaun Públika no ajustamentu remuneratóriu ba iha planu reforma rekursu umanus iha administrasaun Públika Timor-Leste nian iha segunda-feira, (28/04) iha Ministériu Finansas Aitarak Laran, Díli.

Durante reuniaun ekipa rua ne’e diskute klean liu kona-ba reforma iha administrasaun públika, no konfirma servisu sira ne’ebé la’o tiha ona no aprezenta mós rezumu jeral hodi deside iha ekipa rua ne’e.

Planu ne’ebé aprezenta ligadu ba iha IX Governu ninia programa prinsipal ida mak reforma administrasaun públika, nune’e KFP hamutuk ho Finansas atu haree ba reforma refere atu prepara kualidade administrasaun públika hahú husi formasaun ba dirijente sira, preparasaun tama ba ASEAN ho kualidade lideransa ida adekuadu, esplika Prezidente KFP.

Prezidente KFP, Agostiho Letêncio de Deus haktuir,  iha 2015 KFP define tiha ona vizaun estruturante ba reforma nian mak 5R’s (re-estruturasaun, revizaun, reajustar, rasionalizasaun, revitalizasaun), nune’e mandatu dahaat tuir mai haree ba objetivu prinsipal lubuk ida ba reforma ne’e hodi responde ba orientasoens husi Primeiru-Ministru, ne’ebé liu husi konseitu planu reforma hahú husi diagóstiku ne’ebé halo tiha ona. Tanba ne’e KFP iha fulan hirak nia laran konsetra ba define item hirak mak tenke reforma, ikus mai aprezenta ba iha Konsellu Ministru. Husi aprezentasaun ne’e KFP halo mak tamañu forsa traballu tuir ministériu ida-idak, promosaun por antiguidade, no reforma obrigatória ba idade limite.

Ministra Finsansas, Santina José Rodrigues F. Viegas Cardoso iha nia intervesaun ne’e hateten, haree ba iha administrasaun públika forsa traballu ida boot tebes, tempu badak ita tau hamutuk rekomendasaun no konsiderasaun sira ne’e tau hamutuk hodi ba aprezenta iha Konsellu Ministru hodi hamosu rezolusaun husi Konsellu Ministru.

Iha reuniaun ne’e Ministra apresia ba komisárius sira nia servisu, tanba asuntu rekursu umanus sensitivu maibé ita bele konklui hodi envia ba mós karta ba Banku Mundial no PROSIVU hodi haree hamutuk ba asuntu ne’e.