Comissão da Função Pública

Dili, 17 Abril 2024 – Diretór Nasional Planeamentu Kuadru Pesoal Funsaun Públika (DNPKPFP-KFP) no Diretór Nasionál Planu Peskiza Monitorizasaun no Fiskalizasaun FDCH prezensa iha programa “Povu Nia Matadalan”  ne’ebé kolaborasaun ho Radiu Metro FM iha Frekuensia FM 94.7 MHz hodi disemina informasaun sira kona-ba dezafiu, planu prioridade formasaun jeneriku no espesialidade bolsa estudu ho instituisaun Estadu sira.

Iha entrevista ezklusiva ne’e Diretor Nasional Planeamentu Kuadru Pesoal Funsaun Públika, Francisco da Costa Pereira esplika, analiza ba kuadru pesoal durante ne’e instituisaun sira submete mai ho planu formasaun ka dezenvolvimentu tama ba perparasaun Orsamentu Jerál Estadu (OJE) iha kada liña ministerial sira, ne’ebé submete mai KFP planu formasaun hamutuk 279 husi liñas ministeriais 43 hodi implementa ba  tinan 2024 iha liña ministeriais sira. No KFP rasik hahú realiza ona formasaun ba formador sira ba iha programa  desiminasaun ba iha nivel munisipál sira.

Alende ne’e diretor mós esplika katak, KFP hamutuk ho INAP no FDCH konvida instituisaun sira hodi identifika sira nia planu depois mak submete mai KFP ka rekolla  planu no prosesu ba formasaun no bolseiru sira no sei halo analiza haree ba prioridade planu formasaun sira molok tama ba realizasaun.

Iha sorin seluk, Diretór Nasional Planu Peskiza Monitorizasaun no Fiskalizasaun, Moises Soares esplika, liga ba papel FDCH nian, iha 2020 Governu kria dekretu lei 13/2020 ne’ebé mak fo kompeténsia ba Instituisaun Nasionál Administrasaun Públika (INAP) no KFP atu halo jestaun no planeamentu ba formasaun no bolsa Estudu ba funsionáriu públiku iha Timor-Leste. Liga ba ezekusaun hafoin koordena ho INAP no kada tinan INAP sempre atribui programa haat prinsipál mak formasaun jenerizada, espesífiku, bolsa estudu no apoia ka asistênsia ba funsionáriu públiku sira.

Diretor FDCH ne’e akresenta tan oinsá mekanizmu ba atribuisaun bolsa ne’e  FDCH liu husi orsamentu ne’ebé simu husi ministériu Finanças, ho dadus ba bolsa estudu husi tinan 2021-2023 jeralmente ema na’in 4014 (Rihun haat sanulu-resin-haat) ne’ebé hetan bolseiru husi FDCH no liña ministeriais sira iha Governasaun ne’e rezista hotu iha formasaun no bolsa estudu. Wainhira funsionáriu públiku ida atu hetan bolsa Estudu tenke liu husi KFP, tanba KFP rasik mak kontrola funsionáriu públiku sira liu husi sira ninia nivel akadémika.

Iha entrevista ezklusiva ne’e, partisipa husi KFP no FDCH iha programa semanal ne’ebé dirije husi ekipa Rádiu Metro FM Quintal-Boot.