Comissão da Função Pública

Prezidente Interinu Komisáriu KFP ba asuntu pensaun no reforma, Fausto Freitas da Silva iha oportunidade ne’e hateten, Ita halibur malu la’ós de’it atu selebra inísiu ida, maibé atu simu grupu talentu ida-ne’ebé dedikadu atu serbí ita-nia nasaun.

“Ohin loron imi ida-idak iha ne’e reprezenta promesa ida atu defende valór integridade, imparsialidade no excelensia ne’ebé define hanesan baze Funsaun Públika ninian.

Papél funsionáriu públiku nian la’ós de’it servisu ida, maibé hanesan mós vokasaun ida, ho kompromisu ne’ebé kle’an atu halo buat di’ak ba povu no nasaun. No sai nu’udar administradór konfiansa públiku nian, públiku nia konfiansa ba Administrasaun Públika sei depende ba imi nia servisu sira ne’ebé imi halo, tanba imi mak sei apoia implementasaun polítika, programa no inisiativa sira ne’ebé fó impaktu ba sidadaun ida-idak nia moris. Hanesan jerasaun foun ne’ebé iha koñesimentu no abilidade atu hasoru dezafiu hirak-ne’e, tenke lori perspetiva foun, ideia inovativu no deseju atu halo diferensa. Simu dezafiu sira-ne’e, tanba sira mak dalan atu kontribui ba dezenvolvimentu Estadu nian.”

dehan Prezidente Interinu Komisáriu KFP, Fausto Freitas da Silva iha serimónia asinatura termu aseitasaun ba ajente administrasaun públika.

Nune’e Prezidente Konsellu Ezekutivu INCT, José Cornelio Guterres hateten, Institutu ida ne’e hanesan institutu tékniku ida ne’ebé mak ezije servisu ho konfotavél no ho produtividade. Nu’udar funsionáriu ajente tenke fó atensaun no kumpri ba komprimisu kontratu ne’ebé iha ona no sita detallu iha kontratu, atu nune’e fó susesu ba INCT ba PEDN 2011-2030 hodi serví povu no nasaun.

Entretantu Komisáriu KFP husu, atu kontinua hatudu dedikasaun no asaun sira sai nu’udar prova ba valór hirak-ne’e no relembra fali katak: Ita boot sira la’ós de’it atu sai hanesan funsionáriu públiku, maibé ita boot sira mós nu’udar konstrutor ba harii futuru ne’ebé di’ak liu ba ita-nia jerasaun sira ne’ebé sei mai.

Tuir dadus planu rekrutamentu ne’ebé INCT hala’o aprezenta husi Prezidente Juri katak, total kandidatu ne’ebé mak pasa dokumentus hamutuk 443, feto 64 pursentu no mane 36 pursentu. Kandidatus ne’ebé admitidu ba ezame 152 kompostu husi feto 97 pursentu no mane 36 pursentu no ba sesaun entrevista nian nain 6 mak passa hodi asina termu aseitasaun kompostu husi feto nain 4 no mane nain 2.

Partisipa iha serimónia asinatura termu aseitasaun ne’e Komisáriu KFP, Diretora Nasionál Rekrutamentu no Dezenvolvimentu iha Funsaun Públlika, xefe departamentu no funsionáriu INCT.