Comissão da Função Pública

Relasiona ho vizita surpreza ne’ebé mak lidera husi Komisaun Funsaun Públika hamutuk ho KAK, IJE, Diresaun Jeral Jestaun Patrimoniu Estadu realiza tanba, hetan orientasaun husi Primeiru Ministru atu superviziona, kontrola kualidade ba iha ministériu no instituisaun Estadu hotu atu servisu ho di’ak, atu hadia di’ak liutan ba oin, nune’e mós haree ba iha fasilidade suporta sira hodi hala’o servisu ho efisiensia no efikasia liutan, esplika Komisáriu KFP ba portefóliu disiplinar, Agapito da Conceição ba jornalista husi Independente iha ninia knár fatin iha KFP, Matadouro, Díli, iha tersa feira, (11/06/2024).

Rezultadu husi vizita ne’e impaktu ba ministériu hot-hotu, dala barak Komisaun observa funsionárius públikus dala ruma tama tarde no fila sedu, la halo buat ida fila de’it, tanba ne’e husi vizita ida ne’e realiza atu hadia tuir lei nú. 8/2004 altera ba lei númeru 5/2009, estatutu funsaun públika hateten, ne’ebé mak sita dever, direitu no proibisaun sira.

Komisáriu ne’e esplika, iha lei define tama servisu loron ida oras walu, dader tama 08:00 no sai 12:00, depois tama 13:30 no sai fali 17:30. Maibé realidade ami observa iha ministériu no instituisaun sira katak, sira seidauk kumpri ba lei sira ein vigór.

Nia mós sita katak, iha rezultadu vizita ne’e haree mós ba iha fróta veíkulu sira Estadu nian iha ministériu balun sei tula diretores jerais, diretores nasionais sira ba mai uma, mezmu hetan ona subsidiu transporte, ida subsidiu transporte inklui husi xefe departamentu no funsionárius sira mós simu, ita haree realidade sei uza kareta tula sira ba mai uma, funsionáriu sira atraza bebeik dala ruma tama tuku 9:00 sai sedu buat hirak ne’e mak sei fó prejuizu ba Estadu. Nune’e komisaun sei fó sansaun ba funsionáriu sira ne’ebé mak halo iregularidade atu prevene no hadia, no ba buat ne’ebé falta ita sei kompleta ne’e ba ministériu no munisipiu sira.

Liga ho kestaun ne’e, Komisaun mós la’ós halo ba iha ministériu seluk de’it maibé halo mós ba iha KFP rasik ne’ebé implementa lor-loron, ida ne’e atu hatudu katak ami hala’o vizita ba fatin seluk maibé ami mós tenke haree mós ba ami nia uma laran.

Durante vizita ne’e identifika iregularidade lubun ida ne’ebé mak iha maibé ekipa sei tur hamutuk hodi hamosu relatóriu konjunta ida husi KFP, KAK, IJE no Patrimoniu Estadu hodi ita hatene loloos númeru funsionáriu ne’ebé komete iregularidade no husi relatóriu ne’e sei halo mós rekomendasaun ba ministériu sira ne’ebé mak vizita ba hodi hadia no kontrola funsionáriu sira atu hala’o servisu ho loloos, dehan Komisáriu KFP portefóliu disiplinar, Agapito da Conceição.

Relata mós katak, KFP ho ekipa KAK, IJE, Diresaun Jeral Jestaun Patrimoniu Estadu, Ministériu FInansas realiza ona vizita surpreza ba iha Ministériu Komersiu no Industria, Ministériu Agrikultura Peskas Pekuaria no Florestas no vizita mós ba iha Munisípiu Ermera hodi haree observa direta ba Ministeriu no Instituisaun 12.