Comissão da Função Pública

25  Janeiru  2024, Komisáriu  Komisaun  Funsaun  Públika,  José  Telo  Soares  Cristóvão akompaña husi Inspetora KFP, Sonia da Silva Soares ho nia ekipa tekniku sira partisipa  serimónia tomada de posse ba kargus xefias foun nain 40 iha administrasaun jeral  UNTL  iha  salaun auditoria  Politeknika Hera.

Emposadus nain 40  kompostu husi feto 19 no mane 21, mai husi kategoria xefe seksaun  nain 6, xefe departamentu nain 34.

Tuir dadus ne’ebé aprezenta husi Prezidente Juri, emposadu nain 40 ne’e  tuir prosesu formal  selesaun pur meritu liu husi  konkursu internu, ba prosesu dahuluk nian mak dokumentus aplikantes hamutuk nain 420 no passa iha seleksaun dokumentus refere ba iha teste eskrita nian hamutuk 323 no ba sesaun entrevista hamutuk 149, no ba prosesu ikus husi entrevista nian mak passa kandidatus nain 40 mak admitidu.

Iha serimónia posse ne’e liu husi diskursu komisariu  KFP, José  Telo Soares Cristóvão louva  ekipa  juri  no fó parabéns tanba,  sira  nain  40  ne’e  feto  ho  persentagen  50%  no  mane  50%, ne’e   susesu  bo’ot   ida.

Komisáriu KFP ne’e mós kontinua enkoraja emposadu sira katak, UNTL ba oin ho ema kualidade no ho responsabiliade ne’ebé mak liu husi seleksaun méritu ba mandatu tinan haat tenke halo di’ak liu tan hodi dezenvolve UNTL ba oin.

Iha tempu hanesan Reitor UNTL, João Soares Martins iha nia diskursu afirma, empossadus  kargu  xefias  sira atu ezerse duni nia knár ho di’ak iha Administrasaun Jeral  UNTL atu la’o ba oin, ne’e  ba komponentes sira hotu nia esforsu, prepara  jerasaun foun ba  futuru nasaun ne’e papel importante  tebes  mak imi nia knár iha  Administrasaun  Jeral.  Tanba Professores  sira  hanorin  imi  mak  prepara  apoiu  logistika,  enerjia eletríka, tanba ohin loron aprendizajen uza hotu elektronika  digital, la hanesan uluk uza manual laiha ona. Atu asegura  salas de Aulas, Biblioteka no selu-seluk  tan  ne’e  imi  nia liña koordenasaun tenke hadia ho asegura imi nia knár loro-loron nian hodi la’o ho di’ak.