Comissão da Função Pública

Komisáriu Komisaun Funsaun Públika ba asuntu disiplinar, Agapito da Conceição no reprezentante Ministru Justisa ensera formasaun ho tema hadia kualidade servisu no kár funsionáriu públiku Ministériu Justisa ninian ne’ebé durante loron lima nia laran (13-17 maiu 2024), formasaun iha Railaco, munisipiu Ermera.

Iha enseramentu formasaun ne’e Komisáriu KFP, Agapito da Conceição hateten, formasaun ne’e nu’udar estratejia ida ne’ebé esensial ligadu ho programa ka planu reforma ne’ebé la’o hela iha administrasaun públika nian. Iha sentidu ne’e, rekursu umanus konstitui elementu prinsipal ida ne’ebé mak sei kondús prosesu hotu reforma ninian, ho nune’e hasa’e koñesimentu, halo atualizasaun ba abilidade esensial sira tuir dinámika administrasaun públika ohin loron ninian ho kualidade, efisiensia no responsabilidade ba iha prestasaun servisus publikus.

Nu’udar Komisáriu disiplinar nian husu atu hases aan husi prátika konflitu interese, sai obrigasaun ida husi instituisaun no funsionáriu sira, hodi kombaste kontra korupsaun, no hala’o servisu ba loos de’it interese públiku no ba Estadu ida ne’e.

Iha tempu hanesan reprezentante Ministru Justisa, Diretor Jeral hateten, iha formasaun ne’e maioria funsionáriu tuan de’it mak mai tuir formasaun ne’e hahú husi grau kiik F to’o grau A ne’ebé mai husi munisípiu to’o nasionál, tanba sira funsionáriu antigu ne’ebé mak servisu tinan barak nia laran, ne’ebé mak tuir lei hateten funsionáriu iha direitu formasaun.

Nia hatete, la iha ema ida husi liur ka ajensia ruma mak halo BI, sertidaun RDTL, guiaun Obitu no pasaporte, maibé funsionáriu sira mak hala’o servisu sira ne’e, karik durante ne’e iha fallansu agora hetan ona formasaun fila ba bele hadia ona liliu atendimentu ba públiku.

Formandu ne’ebé tuir formasaun total hamutuk 23 kompostu husi feto nain 8 no mane nain 15, mai husi diresaun jeral terras no propriedades, diresaun jeral servisus rejistu notariadu, diresaun nasional servisus prizionais no reinsersaun no sentru formasaun jurídika no judisiais inklui funsionáriu sira Ministériu Justisa nian iha munisípiu sira hanesan Bobonaro, Baucau, Ainaro no Viqueque, ne’ebé iha loron lima nia laran aprende materia sira hanesan atendimetnu públiku, étika moral no administrasaun, disiplina no responsabiliade servisu, papel inspesaun no auditoria no materia ida kona-ba depresaun.

Formasaun ne’e remata ho fahe sertifikadu simbolikamente ba iha funsionárius nain haat.