Comissão da Função Pública

Superitendente no inspetores eskolares 119 husi munisípiu 12 inklui Regiaun Autónoma Espesial Oe-Cusse Ambeno (RAEOA) tuir formasaun iha INFORDEPE, iha kuarta-feira, (24/07/2024) hodi rona kona-ba étika profisional iha Funsaun Públika.

Orador ba sesaun ne’e Komisáriu Komisaun Funsaun Públika portefoliu Disiplinar, Agapito da Conceição hodi esplika kona-ba definisaun étika professional ne’ebé mak liu husi jestu ko’alia, hahalok, disiplina professor sira nian wainhira hanorin alunu sira, hatudu étika ida ne’ebé professional.

Nu’udar superintendente ho inspetores tun ba terenu halo monitorizasaun, fiskalizasaun no investigasaun ko’alia ho ema iha baze ka servisu fatin mós uza étika oinsá atu ko’alia mamar ho ema sira, atu asegura legalidade enkontru, auditoria, avaliasaun no fiskalizasaun ba iha funsionamentu sistema edukasaun nian. Inspetores nia papel mak halo monitorizasaun, no fiskalizasaun ba Manorin nain sira iha baze, tuir étika, professor ida hanorin labarik sira lahatene nia dehan, beik ten ne’e ladun loos tanba, nia lahatene mak mai eskola atu hanorin nia sai matenek, papel professores sira importante tebes atu hanorin ita nia oan sira atu matenek no iha kualidade, aban bainrua sira mak ukun tutan rain ida ne’e, dehan Komisáriu ba asuntu disiplina.

Komisáriu Agapito da Conceição husu ba superintendentes no inspetores ne’ebé tuir formasaun, wainhira fila ba ida-idak nia servisu fatin, aplika buat ne’ebé imi hetan, karik ba halo monitorizasaun hetan professores sira hanorin ladiak fó hatene ba sira atu uza metódu, hanorin ne’ebé labarik sira lalais hatene liga ba atendimentu públiku mós ita uza étika atende Ema ho oin midar, laran mamar nune’e ita entende malu halao buat ne’ebe ita halo hamutuk.

Iha tempu hanesan Sekretáriu Estadu Ensinu Sekundáriu Jeral no Ensinu Sekundáriu Tékniku-Vokasional, Domingos Lopes Lemos iha serimónia abertura ba formasaun superintendentes ho inspetores liu husi nia diskursu hateten, formasaun ne’ebé ita boot sira hodi reforsa imi nia matenek atu atende imi nia servisu  loro-loron, la’ós atu simu kargu tur nonok iha edifisiu maibé, halo planu tun haree eskola iha baze, nia kondisaun servisu, fasilita professores sira hanorin monitoriza ba merenda eskolar no subvensaun eskolar professores ho nia diretores sira oinsá jere tuir regras normal iha dekretu lei haruka, karik iha buat ruma ladun loos, haloos tiha maibé, keta iha indikasaun subar buat ruma investiga sira iha evidensia forte, foti dadus halo prosesu hato’o relatoriu ba KFP diresaun disiplinar atu tetu kazu ne’e karik krime envia ba Ministériu Públiku no kona-ba indisiplinar ruma KFP bele fó sensaun regula tuir lei Funsaun Públiku. Tanba ita asume kargu presiza servisu hamutuk atu hadia ita nia edukasaun rai laran ho kualidade iha loron oin mai.

Tuir formasaun ne’e superintendente nain 13 kompostu husi feto nain 3 no mane nain 10, no inspetores hamutuk 106 kompostu husi feto nain 3 no mane nain 103, ne’ebé mak formasaun hahú 24-26 jullu 2024.