Comissão da Função Pública

Komisaun Funsaun Públika aprezenta ona análize ekipa traballu relasiona ho kresimentu forsa traballu iha Funsaun Públika iha Konsellu Ministru iha semana kotuk liubá (08/09/2025).

“Prezensa semana kotuk iha Konsellu Ministru atu atualiza situasaun jeral kona-ba liu-liu kresimentu forsa traballu, kresimentu saláriu vensimentu, tanba ne’e tuir KFP ninia ponto de vista, análize fatóres sira saida mak halo saláriu kada tinan sa’e. Ligadu ba dekretu lei loos duni katak, forsa traballu hahú husi 2015-2020 kuaze 50 mil, maibé husi 2020 mai to’o agora sa’e ba 70 mil inklui   PNTL no F-FDTL”, esplika Prezidente KFP, Agostinho Letêncio de Deus ba jornalista GMN iha nia knár fatin  Komisaun Funsaun Públika  iha Segunda-feira, (22/09/2025).

Autoridade Funsaun Públika ne’e hateten, ko’alia kona-ba administrasaun  públika t’o ohin loron, funsionáriu permanente no ajente administrasaun públika iha dadus SIGAP FOUN por volta 39 mil. Enkuantu kazuais no asesor sira iha 22 mil ital, ne’ebé ita sura por volta 60 mil.

Prezidente KFP dehan saláriu iha forsa traballu aumentu no kresimentu saláriu ultrapassa tiha ba 400 milloens.

“Kona-ba saláriu vensimentu sa’e husi  200 milloens  desde husi 2015 t’o agora ultrapassa ona ba 300 to’o 400 milloens.  Agora iha fatór ida mak ita haree saida mak ita haree iha kresimnetu rápido iha tinan hira ba kotuk, tanba ne’e primeiru ami aprezenta iha Konsellu Ministru katak, ita iha mudansa estrutura iha Administrasaun, I.P no E.P aumenta entaun lori mós efeitu ida ba aumentu forsa traballu, maibé iha fatór seluk mak kuadrus legais sira, dehan Prezidente KFP.

Nia akresenta liután, iha Administrasaun Públika iha dekretu lei rua ne’ebé mak importante tebe-tebes  atu defini kona-ba saláriu forsa traballu,  liu-liu saláriu ba kazuais sira. Iha dekretu lei  24/2016 ne’ebé altera husi dekretu lei nú.27/2008 kona-ba tabela salarial ba funsionárius públiku. Iha ne’ebá tabela salarial baze ba grau kiik liu mak grau G ho osan 115 dólares Amerikanu, no grau boot liu A ho osan 742 dólares Amerikanu. No iha mós  dekretu Governu nú. 6/2015 kona-ba kontratu rejime jurídiku ba kontratu traballu termu sertu iha administrasaun públika, ne’ebé defini mós saláriu báziku ne’e 400 dólares Amerikanu no saláriu aas liu  mak 800 dólares Amerikanu. Entaun fatór seluk ne’ebé mak kria mós aumentu saláriu ne’e define mai husi kuadrus legais rua ne’ebé mesiona, ida ne’e mak liñas ministeriais sira utiliza atu bele halo kontratu. #Gama