Comissão da Função Pública

Tuir estatístika ein jeral iha Timor-Leste, Ita nia populasaun 1.3 milliaun, ita haree ba mane no feto kuaze hanesan de’it no haree ba situasaun Funsaun Públika atualmente iha funsionárius públiku no ajente administrasaun públika total  hamutuk 36,406, husi total ne’e feto pursentu 35.2% no mane 64.8%, esplika Prezidente KFP ba jornalista sira iha komemorasaun Loron nasionál feto ba dala 46, iha CCD Merkadu Lama, Díli.

“Tuir demográfika populasaun Timor nian ita iha 1.3 milloes populasaun ne’ebé iha haree 50% feto no mane. Nune’e liga ho Funsaun Públika nian ita foin iha 35.2 pursentu, atu hakas an ba pursentu 50 presiza ita hotu nia esforsu, inklui média sira oinsá atu sensibiliza liu tan ema nia hanoin, pensamentu ba igualdade jéneru inklui atu tama ba funsaun  públika ne’e presiza sensibilizasaun forte, pro ativu no progresivu liu tan”, haklean Prezidente KFP, Faustino Cardoso Gomes.

Iha mós komponentes kazuais kuaze iha 7 mil, ne’ebé mak iha kazuais iha nivel ministériu ninia persentajen feto tun liu, fatin balun 90 pursentu mane. Tanba ne’e KFP halo esforsu ida atu oinsá mak iha sistema kontratasaun ida ne’ebé mak uniforme, aplika ba hotu no ezijensia oinsá atu aplika obrigasaun kuota ba feto, ba kazuais nian atu bele fó atensaun ba persentajen prezensa no partisipasaun feto nian, dehan Faustino Cardoso Gomes.

Ba kargus diresaun no xefia iha nivel Funsaun Públika hamutuk 3,812 ba rejime jeral iha feto 21.9 pursentu no mane 78.1 pursentu, la konta edukasaun nian ne’ebé mak iha eskola ida iha kargu xefia nain 3 hahú husi diretor eskola, adjuntu diretor eskola no gabinete apoiu tékniku ne’ebé iha Timor laran tomak eskola hamutuk 1,900 ital, ne’ebé eziste kuaze 5 mil ital, ne’ebé mak iha edukasaun nian feto mós kuaze asume kargu.

Entretantu, liu husi teste feto iha dominiu atu hakas aan atu hatudu sira nia independensia no dehan katak, sira mós bele, realidade Komisaun iha, feto sira relativamente persentajen aas liu kompara ho mane sira.

KFP enkoraja feto sira hahú kedas husi prosesu kandidatura ba kargu diresaun xefia, rekrutamentu sira, no komisaun mós rekomenda ba superior másimu hisi instituisaun ida-idak atu tau konsiderasaun, importansia feto iha Funsaun Públika.