Comissão da Função Pública

Komisaria Komisaun Funsaun Publika-KFP Portefoliu Dezenvolvimentu Karreiras Especiais Anita Tavares Ribeiro de Jesus reprezenta Prezidente KFP Agostinho Letêncio de Deus, loron 25 Fulan Setembru 2026 partisipa iha serimonia Bemvindu ba Mediku no Enfermeiru espesialista nain 26, ne’ebe termina sira nia  Estudu iha Cuba hodi fila fali mai Timor Leste iha Palacio das Sinzas Dili.

Iha serimonia ne’e Komisaria hato’o mensajen ba  medikus  no Enfermeiru sira inklui partisipantes tomak katak Komisaun orgulhu no honra bo’ot, tanba ne’e hodi KFP nia naran fo parabens  ba  Mediku  no Enfermeirus sira  ne’ebe  akaba ona sira nia Kursu fila mai  ita nia Rain Timor atu servi ita nia Povu.

Komisaria ne’e hateten, ne’e hanesan konkista ida iha prosesu dezenvolvimentu iha setor  Saude, tanba ne’e agradese ba Instituisaun hotu ne’ebe maka hola parte iha formasaun no  Dezenvolvimentu capital Umanu especial ba Ministeriu Saude ho konsiderasaun katak komisaun Funsaun Publika maka halo Gestaun Direta ba rekursus Umanus, nune’e rekursu ne’ebe  formadu no kapasitadu sei  kontribui metas  iha  area  Saude iha aspetu  rekursu Umanu nian.

Hakarak aproveita okaziaun ida ne’e husu ba bolseirus nain 26, ne’ebe remata ona estudu, presiza hanoin atu kontribui ba Estadu ida ne’e, li-liu Ministeriu  Saude, KFP iha esperansa ba Medikus no Enfermeirus sira fila ona mai Timor Leste, tuir regras ne’ebe iha  sei atribui  imi  nia  direitu, maibe sei hare mos kriterus ne’ebe hatur ona, sei presta lai servisu mak tuir mai halo promosaun ho Lei  ne’ebe hatur ona.

Parte seluk, Vice Ministro Saude Jose dos Reis  Magno hato’o benvindu ba medi-kus espesialista nain rua nulu resin hat no espesialista Enfermeiru nain rua no konsidera loron ida ne’e  signifikadu bo’ot tebes ba Ministeriu Saude, ba sistema Saude Nasional, ba  povu Timor  Leste,  programa Governu nian, ohin ne’e simu medikus no Enfermeirus espesialistas sira, ne’e susesu ba Povu Timor Leste, ne’ebe ohin selebra, tamba sira kumpri dever obrigasaun ba estuda iha Ema nia Rain ho seriedade bele akaba sira nia kursu iha tempu determinadu. Serimonia benvindu ba medikus no enfermeirus sira ne’e partisipa husi Diretor INAP Sr  Policarpo Amilcar Boavida, Diretor FDCH Julio Aparicio no Familias medikus no Enfermeirus sira nian.