Comissão da Função Pública

Kinta-Feira ne’e, 07/09/2023 Prezidente Komisaun Funsaun Públika-KFP Faustino Cardoso Gomes, Komisariu Fausto da Silva Freita, Komisaria Maria de Jesus Sarmento, Sekretaria Ezekutiva Maria da Costa Oliveira ho Ekipa KFP simu vizita ofisial husi Ministra Edukasaun Dulce de Jesus Soares ho nia ekipa iha edifisiu KFP Matadoru Díli.

Ministra Edukasaun Dulce de Jesus Soares hateten, objetivu vizita ne’e atu halo enkontru entre ekipa Ministériu Edukasaun ho ekipa KFP nian hodi diskute kona-ba subsidiu transporte ba profesor sira, engresu espesial ba profesor sira, reforma no kargu Xefia sira iha Ministériu Edukasaun nian.

Ministra esplika liu tan katak enkontru ne’e ekipa rua konkorda atu hari’i ekipa konjunta ida, kompostu husi ekipa Ministériu Edukasaun no KFP nian atu hodi hare’e no hala’o servisu ne’e ba to’o rohan, tanba tenke prienxe rekezitu sira, nune’e bele kompleta dokumentus sira tuir informasaun daduz sira ne’ebé KFP oferese ona ba iha Ministériu Edukasaun, atu profesor sira bele hakat ba sira nia rejime karreira espesial no bele goza sira nia direitu sira.

Prezidente KFP Faustino Cardoso Gomes hateten, Komisaun hahú kedas hatudu vontade forte atu servisu hamutuk hodi rezolve situasaun sira ne’ebé maka Profesor sira hasoru, liu husi esklaresementu kona-ba Direitu, Deveres, rejime karreira to’o iha Administrador Postu sira, maibé iha mós dezafiu liu-liu iha mudansa Governamental, ne’ebé afeta mós ba desizaun sira iha âmbitu rezolve profesor sira nia situasaun no agora KFP entende katak nonu Governu iha vontade forte, liu husi esperiensia Ministra nian ne’ebé koñese di’ak tiha ona situasaun Edukasaun nian, fasil liu hodi kompriende situasaun no bele servisu hamutuk ho Komisaun buka rezolve situasaun profesor sira nian.