Comissão da Função Pública

Komisáriu Komisaun Funsaun Públika Portefoliu ba Planeamentu Forsa Traballu, José Telo Soares Cristovão enkontru ho Inspesaun Jeral Traballu (IGT) no Ministériu Transporte no Komunikasaun (MTC) hodi ko’alia kona-ba planu rekrutamentu no jestaun rekursus umanus.

Objetivu enkontru ne’e halo konsultasaun no husu Komisaun ninia apoia hodi fasilita Instituisaun no Ministériu refere ba iha prosesu rekrutamentu.

Durante enkontru, Diretur Jeral MTC, Aniceto Leto hato’o sei loke vagas 53, hahú husi grau A to’o grau E (Grau A vaga 5, grau B vaga 10, grau C vaga 8, grau D vaga 12 no grau E vaga 20) ho totál orsamentu ne’ebé aprova tiha ona hamutuk 288 mil dolares, ho bele koresponde ba iha nesesidade instituisaun ninian.

Komisáriu esplika, Komisaun ninia papel mak atu atende problema funsionáriu sira rekrutadu, atu kontrola prosesu rekrutamentu no kontrolu Administrasaun Públika, la’ós desizaun ba iha rekrutamentu.

Komisáriu José Telo Soares Cristovão mós esplika klean katak, iha IV mandatu mai ona ho planu rejime kareira foun ida ne’ebé mak Komisaun aprezenta ona iha Prezidensia Konsellu Ministru liu husi Vise Ministru Asuntu Parlamentares no tempu besik sei halo mós konsultasaun ho liñas ministeriais hodi haree didiak planu reforma Funsaun Públika. Ho ida ne’e mak bele solusiona rekrutamentu ba iha nesesidade Ministériu sira nian inklui Ministériu Transporte no Komunikasaun hodi aposta ba iha Ajente Administrasaun Públika. Hafoin tinan oin liu husi prosesu halo pedidu atu halo nomeasaun ekipa juri hodi hahú halo rekrutamentu ba iha Ajente sira tuir planu orsamentu ne’ebé ministériu prevé ba rekrutamentu.

Enkontru ne’e hala’o iha KFP hetan partisipasaun mós husi Diresaun Rekrutamentu no Planeamentu Kuadru Pessoal iha Funsaun Públika, ne’ebé realiza iha tersa-feira, (06/06/2024).