Comissão da Função Pública

Prezidente Komisaun Funsaun Públika, Faustino Cardoso Gomes sai orador ba iha Loron Nasional Saúde ho tema jeral “Lori Saúde Ba Ema Hotu Atu Moris Di’ak no Dignu” ne’ebé hala’o ohin (22/07/2019) iha CCD, Merkadu Lama, Dili.

Iha sesaun aprezentasaun ne’e Prezidente KFP koa’lia kona-ba Funsaun Públika no Dezempeñu Profisional Saúde sira nian liga ho kareira sira saúde nian ho avaliasaun dezempeñu, dezenvolvimentu kareira profisional saúde nian depende ba rezultadu avaliasaun dezempeñu hodi bele hetan progresaun no promosaun liga ho DL 13/2012 Ministériu Saúde nian.

“Dezenvolve ba kareira sira ba progresaun no promosaun to’o oras ne’e seidauk iha progresaun regular, tanba ne’e progresaun presija lista haree ba tinan naruk servisu, liga ho avaliasaun dezempeñu, formasaun no antiguidade servisu tuir kriteriu sira iha DL 13/2012 ministériu saúde nian,”dehan Prezidente KFP wainhira orador iha Loron Nasional Saúde nian.

Enkuantu rejime remuneratóriu sira ba médiku sira no ba profisional saúde sira seluk  liga ho rejime normal no rejime servisu turnos nian, atendimentu profisional saúde ba públiku no husu atu hadia diak liu tan ba iha futuru.

Iha tempu hanesan Fautino Cardoso Gomes koa’lia mós kona-ba profisional sira iha servisu prestasaun efetiva ba kuidadus saúde nain no toka mós kargu diresaun xefia iha ministeriu saúde ne’ebé mak sei iha extensaun nia laran, despois promosaun jeral, KFP sei komunika ba ministériu relevantes sira inklui Ministériu Saúde atu tur hamutuk hodi haree ba preparasaun promosaun ba rejime espesial inklui profisional saúde atu hetan progresaun, tanba lakohi prejudikadu no sei avansa mós ho selesaun pur méritu ba kargu diresaun no xefia sira iha ministériu ida-idak.

Iha serimonia komemorasaun ne’e Eis Primeiru Ministru VI Governu Konstitusional Rui Maria de Araújo aprezenta mós matéria kobertura universal saúde iha Timor-Leste: progresu no dezafius noMinistériu Saúde lansa mós livru bolsa estudu ba profisionais saúde sira no animasaun dansa kultura.