Comissão da Função Pública

KFP Partilla Promosaun Por Antiguidade ba Liñas Ministeriais

Komisáriu Komisaun Funsaun Públika portefóliu ba forsa traballu, José Telo Soares Cristovão akompaña husi Diretora DNRDCFP, Marcelina Irene dos Santos Mesquita no tékniku Sekretariadu Komisaun Funsaun Públika segunda-feira (17/03/2025) halo enkontru ida ho Diretores no xefe departamentu servisu rekursu umanus husi kada liñas Ministeriais no Munisípius inklui RAEOA hodi halo diskusaun kona-ba planu promosaun por antiguidade ba funsionáriu rejime kareira jeral.

Komisáriu José Telo Soares Cristovão iha abertura enkontru esplika ba diretores, pontu fokais servisu rekursu umanus katak, objetivu husi enkontru ne’e atu esplika ba direktor jeral, diretores, xefe departamentu servisu rekursus umanus atu kompriende di’ak liután kona-ba dekretu lei no 46/2024, 23 de dezembro sobre promosaun por antiguidade ne’ebé Komisaun Funsaun Públika aprezenta ba Konsellu Ministru aprova ona no oinsá atu kontinua fahe informasaun ba funsionáriou sira iha kada instituisaun no Munisípiu sira antes ba implementasaun.

Polítika promosaun por antiguidade ba funsionáriu rejime jeral vaga la autómatiku maibé kontinua ho méritu, tanba bazeia ba pontuasaun, avaliasaun dezempeñu, sertifikasaun formasaun no rekezitus importante sira seluk ba kada grau. Lista ba promosaun por antiguidade ba funsionáriu rejime jeral sei entrega ba servisu rekursu kada liñas ministeriais iha fulan ida ne’e nia laran no ejize ba servisu rekursu umanus atu haree ho didiak kona-ba pontuasaun inklui rekezitus sira seluk antes finaliza, esplika Komisáriu.

Iha enkontru ne’e ekipa téknika halo mós aprezentasaun dekretu lei 46/2024 23 de desembro sobre promoção por antiguidade, rezolusaun Governu númeru 12/2025, no deliberasaun 399/2025/CFP kona-ba promosaun por antiguidade ba funsionáriu rejime kareira jeral.

Funsionáriu rejime kareira ne’ebé elejivel no total vagas aprovadas 3,540 kompostu Grau B – A = 60 vagas husi pursentu 20, Grau C – B = 223 pursentu 25, Grau D – C = 561 pursentu 40, Grau E – D = 965 pursentu 50, F – E = 1051 pursentu 80, no asistente Grau G – F = 680 ho pursentu 90.