Comissão da Função Pública

Komisaun Funsaun Públika partisipa iha workshop kona-ba Implementation of Meritocracy Principles through Talent Management ne’ebé hala’o iha loron 22 to’o 23 Outubru 2025 iha National Civil Service Agency (NCSA) Jakarta, Indonézia.

Workshop ida ne’e hola parte ba ACCSM+3 Work Plan 2021–2025 ne’ebe organiza husi ACCSM Indonézia ho Objetivu atu promove jestaun Servisu Públiku ne’ebé justu, efisiente no sustentavel entre Membru ASEAN, Timor-Leste, no partseiru Plus Three – Xina, Japaun no Kórea do Sul. Workshop ida ne’e mos fó espasu ba partisipante sira atu partilha esperiénsia, troka prátika di’ak sira, no diskute estratéjia atu reforsa meritokrasia no profisionalizmu iha setór públiku nian.

Finalidade no objetivu husi workshop ne’e atu kontinua iha kolaborasaun entre AMS+3 no Timor-Leste no mós troka informasaun, inovasaun, no prátika di’ak sira hanesan; estratéjia implementasaun jestaun talentu servisu sivíl bazeia ba méritu, hodi foka ba mobilidade talent, kriasaun perfil dadus funsionáriu públiku sira no governasaun dijitál hodi apoia nesesidade dadus ba mobilidade talent, supervizasaun jestaun servisu sivíl, inklui kestaun no métodu, abordajen ASEAN nian ba avaliasaun talentu hodi promove kuadru bazeia ba dadus no haforsa sistema jestaun dijitál bazeia ba méritu, uza teknolojia dijitál ba hasa’e kualifikasaun (upskilling) no rekualifikasaun (reskilling) ne’ebé estruturadu no iha eskala boot, hodi apoia dezenvolvimentu kompeténsia dijitál.

Durante loron rua atividade ne’e, partisipante sira aprende kona-ba importánsia atu aplika prinsípiu meritokrasia iha jestaun rekursu umanu, ne’ebé garante prosesu rekrutamentu, promosaun no dezenvolvimentu kareira bazeia ba kualifikasaun, dezempeñu no integridade. Durante diskusaun sira, koalia mos konaba tópiku importante sira hanesan mobilidade talent, perfíl dadus servisu públiku, governansa dijitál no uza teknologia dijitál sira ba large-scale upskilling and reskilling programs.

Partisipasaun KFP nian iha workshop ida ne’e hatudu ninia kompromisu forte atu kontinua hadia sistema servisu públiku ne’ebé profisionál, transparente no responsavel. Konhesimentu ne’ebé hetan hosi atividade ne’e sei ajuda KFP atu kontínua reforsa estrutura jestaun rekursu umanu bazeia ba meritokrasia no hadia kualidade servisu públiku iha Timor-Leste tuir padrãu rejional no internasionál nian. No iha mós rekomendasaun sira ligadu ba polítika kona-ba mobilidade talentu hodi haforsa implementasaun sistema méritu, ne’ebé sei inklui iha Planu Servisu ACCSM no ACCSM+3 2026-2030.

Ekipa husi KFP reprezenta husi Xefe Unidade Dezenvolvimentu Sistéma Informasaun iha Funsaun Públika, Marfilho Fidel Álvares Pereira, Diretora Nasional Rekrutamentu no Dezenvolvimentu Kareira iha Funsaun Publika, Marcelina Irene dos Santos Mesquita,Senior Professional, Belarmino Filomeno Neves no akompaña husi pontu fokal,  Lorga dos Santos.