Comissão da Função Pública

Tersa Feira, loron 27 fulan juñu tinan 2023, Komisária Komisaun Funsaun Públika, Maria de Jesus Sarmento, partisipa iha serimónia Lansamentu Estratéjia Nasional Dezenvolvimentu Estatístika 2023 – 2033, iha Salaun Auditóriu Ministériu Finansas, Aitarak-Laran Dili.

Iha lansamentu ne’e, Ministru Finansas Rui A. Gomes hateten, susesu Timor-Leste ninian tamba la’o ho Banku Mundial, nomós ho parseiru dezenvolvimentu sira, no Lansamentu Estratéjia Nasional Dezenvolvimentu Estatístika 2023 – 2033 núdar dokumentu importante sei sai matadalan ba dezenvolvimentu Instituto Nasional Estatístika, I.P (INETL, I.P) iha futuru.

Iha tinan 2003 governu Timor-Leste aprova dekretu-lei númeru 17/2003, 01 outubru hodi estabelese Diresaun Nasional Estatístika, ne’ebe responsabiliza servisus kolesaun dadus, prosesa, análize no dissemina dadus  estatístika nasional. Liu tiha tinan 20, ho dekretu-lei 3/2023, 15 fevereiru Diresaun Nasional Estatístika nakfila-an ba iha Instituto Nasional Estatístika, I.P (INETL, I.P). Transformasaun ne’e atu melhora servisu efisensia no hasa’e kapasidade jestaun no fó autónomia boot liu tan hodi presta servisu públiku ho kualidade, imparsialidade no responsavel ba produsaun estatístika iha nivel nasional.

Iha tempu hanesan Prezidente Instituto Nasional Estatístika, I.P (INETL, I.P), Elias dos Santos Ferreira hateten, razaun hodi halao lansamentu stratéjia ba dezenvolvimentu estatístika nasional ne’e, tamba kapasidade nasaun nian atu nafatin kompetetivu iha ekonómia mundial modernu, depende ba kapasidade atu utiliza dadus nasaun nian nian.

Nune’e mós reprezentante Banku Mundial Bernard Harbone apresia governu Timor-Leste no kompremetidu sei atu kontinua fó apoio nafatin, hodi sai nasaun ne’ebé forti liu tan iha dezenvolvimentu nasional. Lansamentu Estratéjia Nasional Dezenvolvimentu Estatístika 2023 – 2033  hala’o iha Salaun Auditóriu Ministériu Finansas, Aitarak-Laran Dili no hetan partisipasaun husi United Nations Development Programme-UNDP, United Nations Children’s Fund-UNICEF, World Food Programme-WFP, United Nations Entity for Gender Equality and the Empowerment of Women-UNWOMEN, Food and Agriculture Organization-FAO, World Health Organization-WHO, International Labour Organization-ILO, International Organization for Migration-IOM, Asian Development Bank-ADB, United Nations Educational, Scientific and Cultural Organization-UNESCO, Sosiedade sivíl, no Universitáriu sira.