Comissão da Função Pública

Prezidente Komisaun Funsaun Públika Faustino Cardoso Gomes ho Komisário Fausto Freitas da Silva Kuarta-feira loron 5 fulan jullu tinan 2023 halao vizita urjente ba iha Sekretariadu Estadu Comunidade Timorense Exterior, iha Edifísiu CPLP Bairro dos Coqueiros Dili.

Vizita ne’e ho objetivu atu hare diretamente situasaun servisu iha Sekretariadu nian, li-liu ba aspetu rekursu umanu, Lojístiku no pesoal apoiu iha terenu, atu nune’e bele atualiza ba Primeiru Ministru IX Governu Konstitusional, tanba Sekretariadu Estadu Comunidade Timorense Exterior esklui husi organika Governu foun nian, tanba ne’e Komisaun Funsaun Públika nain ba Administrasaun Públika iha dever atu hatene situasaun no kondisaun ba iha futuru.

Prezidente Faustino rekomenda, Funsionáriu 18 ho Diretores sira sei fila fali ba nia orijem servisu  uluk hanesan bai-bain, inklui halo transferênsia sasan sira ne’ebé maka uza durante ne’e hodi apoiu funsionamentu Sekretariadu Estadu foun ne’e.

Iha oportunidade ne’e Inspetor Cornélio dos Santos da Silva informa ba iha  Prezidente Komisaun Funsaun Públika ho Komisáriu Fausto Freitas da Silva katak Sekretariadu Estadu Comunidade Timorense Exterior iha Diresaun Jeral ida, Diresaun Nasional 3, Inspesaun I ho Funsionáriu Públiku hamutuk nain 18, ho nia fasilidade Kareta operasional 3 inklui ho kareta ida ba Sekretáriu Estadu.

Inspetor ne’e kompromete sei fila fali ba nia servisu orijem, depois de entrega nia responsabilidade, tanba provizóriamente sei interina  hela hanesan Diretor Jeral tanba Diretor Jeral ho Diretor sira seluk desloka hela ba Portugal halao misaun de servisu.

Entretantu iha loron hanesan Prezidente Komisaun Funsaun Públika Faustino Cardoso Gomes ho Komisário Fausto Freitas da Silva halao mos vizita derepente ba iha Sekretariadu Estadu Arte Kultura iha Bairro dos Coqueiros Dili, hodi buka atu komprende situasaun Ministerio Juventude Desportu no Arte Kultura, ne’ebe sei akomula Sekretáriu Estadu Juventude Deportu ne’ebé uluk iha Ministériu Edukasaun Juventude Desportu nia supervizaun, ho Sekretáriu Estadu Arte Kultura ne’ebé uluk iha Ministériu Ensinu Superior Siênsia no Kultura nia mahon.

Tuir Prezidente katak situasaun tranzisaun husi Instituisaun ida ba ida seluk, komisaun funsaun publika buka atu hatene hodi jere Funsionáriu sira tuir situasaun sira ne’ebe iha.

Iha oportunidade ne’e Diretor Jeral Sekretariadu Estadu Arte Kultura Manuel Ximenes Smith klarifika katak atualmente sei dependênsia administrativamente ba iha Ministériu Siênsia e Kultura tanba sidauk muda nia Koding-Blook inklui mos Orgánika Governo konaba orientasaun polítika, liu-liu ba servisu Sekretariadu Arte Kultura iha juventude no Desportu.

Iha tempu hanesan Komisariu Fausto da Silva Freitas apresia ba Sekretariadu Arte Kultura tanba iha orientasaun ba Diresaun sira hodi ajusta servisu sira ne’ebe tutela ba Sekretariadu tanba kompara ho tinan hirak liu ba wainhira Ministériu balun taka difísil buka tuir sasan Estadu li-liu ba kareta Estadu balun ne’ebé sosa foun to’o buka lá hetan no balun troka plat foun tau ba naran privadu.

Hafoin vizita tiha Sekretariadu Estadu Arte Kultura Prezidente ho Komisáriu halo mos vizita derepente ba iha Ministériu Juventude Desportu no Arte Kultura iha Lesidere ho objetivu atu halo tranzisaun ida ke diak, armonia, paz, damen no seguru nakonu ho responsabilidade.

Enkuanto Diretor Jeral Ministériu Juventude Desportu no Arte Kultura David Tomás de Deus informa ba Presidente ho Komisario KFP katak iha Segunda-feira ne’e halo kedas primeiru enkontru ho Ministru ho Sekretriu Estadu hodi simu orientasaun polítika tuir mudansa orgánika IX Governo Konstitusional nian. Faustino Cardoso nudar Prezidente Komisaun Funsaun Públika hateten rezultadu husi vizita urjente ne’e, sei aprezenta ba iha Primeiru Ministru iha tempu badak, bazeia ba pedidu audiênsia ne’ebé iha foin lalais ne’e.