Kinta-feira, 24/04/2025 – Komisária portefóliu ba Dezenvolvimentu Kareira Espesiais, Anita Tavares Ribeiro de Jesus sai orador iha worshop ho tema “Jestaun no Governasaun Di’ak” no sub tema “Sistema Kontrolu Interna” ne’ebé organiza husi Gabinete Inspesaun no Auditoria Sekretaria Estadu Igualdade (SEI).
Komisária Anita Tavares Ribeiro de Jesus durante aprezentasaun ko’alia liu kona-ba papél Komisaun Funsaun Públika no lei sira atu oinsá garante funsionárius nia responsabilidade iha funsaun sira ne’ebé estabelese baze ba Lei 7/2009, 15 fulan-Jullu, atu garante rekrutamentu tuir méritu, promove respeitu ba kódigu étika Funsaun Públika no kultura servisu ho melloramentu kontínua ba dezempeñu no jestaun, garante realizasaun atividade formasaun no kapasitasaun, dezenvolve no implementa estratejia ba jestaun no planeamentu forsa traballu, instaura, kondúz no deside prosesu disiplinar, aplika pena no deside rekursu sira, akonsella Governu ba remunerasaun no kondisaun servisu, inklui benefísiu sira, realiza rekrutamentu, nomeasaun no promosaun.
Atu kontribui ba Governasaun di’ak funsionáriu ida-idak tenki hatene no kumpri devér jerál no espesial atu servisu ho lealdade objetividade, obidiénsia, kumpri orden superiór tuir lei, sijilu ka rai segredu profisionál, izensaun, asiduiddade, pontualidade tama no sai servisu. Hala’o funsaun ho efisiente, imparsiál no profisional, tau interese nasaun nian aas liu interese pesoál eh grupu.
Proibisaun sira nu’udar funsionáriu públiku maka labele hala’o atividade, ne’ebé predujika onra no dignidade Estadu, abuzu poder, uza osan beins no propriedade Estadu ba interese pesoál ka grupu, labele sai intermediáriu ba kompañia ruma atu hetan kontratu aprovizionamentu nian, labele hala’o atividade polítika partidária iha oras servisu, esplika Komisária KFP.
Entretantu Sekretaria Estadu Igualidade, Elvina de Sousa Carvalho ne’ebé halo abertura ba worshop ne’e hahú halo apresiasaun ba inisiativa Gabinete Auditoria Interna SEI nian ne’ebé kontinua fó importansia ba hasa’e koñesimentu funsionáriu sira nian iha SEI, kona-ba prosedimentu legais sira, lalaok di’ak servisu iha administrasaun públika liga ba jestaun boa governasaun iha administrasaun públika, atu oinsá servisu ho transparante, integridade, baze ba prinsípiu boa governasaun, hodi kontribui ba dezenvolvimentu.
Materia aprezentasaun orador sira husi KFP, KAL no Ministériu Finansas, durante worshop sei haforsa servisu GIA nian internalmente atu halo kontrolu no akompañamentu hodi asegura transparansia boa governasaun, boa jestaun no evita mal jestaun administrasaun, korupsaun, iha SEI rasik.
Sekretáriu estadu ne’e dezeju, worshop nee bele guia funsionáriu SEI ho dirijentes tomak atu komunga prinsípiu boa governasaun, transparansia no uza rekursu ne’ebé iha ba ezekusaun orsamentu jeral Estadu tuir regra, prodsedimentu no mantein integridade hodi sai ajentes taransformdor iha prosesu dezenvolvimentu.
Partisipa iha worshop ne’e kargu dirsaun no xefia iha SEI Nasional no Munisípiu, funsionáriu permanente no ajentes administrasaun balun hamutuk ema nain 46, kompostu feto nain 20 no mane nain 26.
Worshop ne’e hala’o iha salaun enkontru SEI Caicoli, Dili.
