Prezidente Interinu Komisaun Funsaun Públika Komisáriu José Telo Soares Cristovão, Komisária Anita Tavares Ribeiro de Jesus ne’ebé akompaña husi Sekretáriu Ezekutivu Interinu Diretor UDSIFP Marfilho Fidel Alvares Pereira no asesór jurídiku Afonso Soares audiensia iha reuniaun Konsellu Ministru iha kuarta-feira, 08/10/2025, iha Palásiu Governu.
Iha enkontru ne’e Konsellu Ministrus aprova projetu Rezolusaun Governu ne’ebé aprezenta hosi Ministru Prezidénsia Konsellu Ministrus, Agio Pereira, no Prezidente Interinu Komisaun Funsaun Públika, José Telo Soares Cristovão kona-ba formasaun karákter ba funsionárius resém rekrutadus ba iha kareira Funsaun Públika.
Rezolusaun Governu ida-ne’e ho objetivu atu hametin étika, disiplina, lideransa no sentidu servisu públiku funsionárius públikus hotu-hotu nian, hodi nune’e bele promove Administrasaun Públika ida ne’ebé ho integridade, efisiénsia no kompromisu boot liu ba valór sira Estadu nian. Medida ne’e nu’udar parte hosi reforma ne’ebé la’o daudaun iha jestaun no dezenvolvimentu rekursus umanus ne’ebé prevee ona iha Programa Governu Konstitusionál da-9 nian, ne’ebé destaka importánsia formasaun nian nu’udar instrumentu esensiál atu hametin lideransa, transparénsia no responsabilizasaun iha setór públiku.
Formasaun ne’e kontínua no sei kobre komponente karakter, ierarkia no disiplina, sidadania, patriotizmu, no nasionalizmu nian, hodi haburas kultura respeitu institusionál, kumprimentu ba norma legál sira, no mós valorizasaun ba kna’ar funsionáriu públiku nian iha konstrusaun Estadu no dezenvolvimentu nasionál. Sei inklui mós modulus kona-ba abilidade profisionál sira, hanesan jestaun efisiente, serbisu iha ekipa no rezolve dezafiu no konflitu sira iha servisu públiku, no mós área relevante sira seluk.
Komisaun Funsaun Públika sei responsabiliza ba koordenasaun dezenvolvimentu kurríkulu no servisu hamutuk ho instituisaun relevante sira hodi determina fatin no kondisaun ba realizasaun formasaun. Partisipasaun hosi funsionáriu sira iha atividade sira-ne’e nu’udar komplementu obrigatóriu ida ba rejime formasaun no dezenvolvimentu profisionál ne’ebé daudaun ne’e vigora. #PortaldoGoverno
