Segunda-feira, 13 Jullu 2026 – Komisaun Funsaun Públika no Ministériu Defeza fo tomada pose ba kargus diresaun no xefias, iha MD, ne’ebé hala’o iha Auditorium F-FDTL, Fatuhada.
Iha diskursu husi Prezidente KFP Agostinho Letêncio de Deus hato’o Okupante kargu diresaun no xefia sira iha instituisaun Administrasaun Públika nu’udar dirijente imediatu ne’ebé hetan orden hosi superior máximu instituisaun nian, iha ámbitu oinsa atu asegura implementasaun polítika no prioridade Governu nian.
Iha kontestu Administrasaun Públika, pose nu’udar tradisaun ida ne’ebé sai ofisial, públiku no solene, atu demonstra ba publiku katak, liuhosi meiu ne’e, okupante nomeadu kompromete, hodi hala’o funsaun no papél estratejiku sira dedikadu ba meta no prioridade instituisaun nian, dehan Prezidente KFP.
Nune’e, iha diskursu husi Ministru MD, Donaciano do Rosário da Costa Gomes “Pedro Klamar Fuik” hatete, ohin imi hamrik hodi presta juramentu, ne’ebé afirma imi-nia dedikasaun la’os de’it ba imi-nia organizasaun, maibé ba prinsípiu sira ne’ebé organizasaun ne’e reprezenta hanesan: integridade, servisu, profisionalizmu no kolaborasaun. Imi nia juramentu ne’e solene. Signifika katak, imi-nia vontade atu kontribui ho imi-nia tempu, koñesimentu no esforsu ba buat di’ak mós tenki boot.
Ba empossado sira, Kontra-Almirante ne’e apelu katak, promesa traballu nian la’os ba manan buat ruma ba an rasik, maibé ba progresu koletivu Estadu no Nasaun nian; la’os ba rekoñesimentu pessoal, maibé ba impaktu boot, liu-liu melhoramento ba missaun militár sira nian. Hatudu katak, iha Ministériu Defeza Civil no militar sira bele kolabora malu no respeita malu mutuamente hodi serve de’it ba interese komun Estadu-Nasaun nian, dehna Ministro Pedro Klamar Fuik. Serimónia tomada pose ne’e ba ba estrutura Diresaun Jeral Jestaun Estratégia Defeza hamutuk na’in ualu ne’ebé kompostu mane hotu.
