Gleno, Ermera — Ekipa konjunta kompostu husi Komisaun Funsaun Públika (KFP), Inspesaun Jerál Estadu (IGE), Ministériu Administrasaun Estatál (MAE), Sekretaria Estadu Igualdade (SEI), Institutu Nasionál Seguransa Sosiál (INSS), Komisaun Reguladora Arte Marsiais (CRAM) no Komisaun Nasionál Eleisaun (CNE), hala’o diseminasaun durante loron lima, hahu husi loron 24 to’o 28 Agostu 2026, iha Gleno, Munisípiu Ermera.
Diseminasaun ne’e fó atensaun ba Lei, Dekretu-Lei no prosedimentu sira ne’ebé atu asegura profisionalizmu iha Funsaun Públika, ho objetivu atu hasa’e efisiénsia no efetividade iha prestasaun servisu públiku.
Atividade ne’e loke ofisialmente husi Komisária Komisaun Funsaun Públika, Responsável ba Asuntu Dezenvolvimentu Karreira Espesiál, Anita Tavares Ribeiro de Jesus, no Sekretáriu Munisipál Ermera, António da Costa Alves.
Iha nia diskursu, Komisária Anita Tavares Ribeiro de Jesus husu ba partisipante sira, ne’ebé kompostu husi xefe sessaun, departamentu, direksaun no funsionáriu sira, atu aproveita ho di’ak oportunidade diseminasaun durante loron lima ne’e.
Nia hateten katak importante ba partisipante sira hotu atu rona no komprende ho didi’ak matéria ne’ebé aprezenta husi oradór ida-idak, tanba matéria sira ne’e bele aumenta koñesimentu no kapasidade hodi kumpre regra Estadu nian, no hala’o servisu iha área profisionál ida-idak tuir dispozisaun Lei.
Komisária KFP mos husu ba Administradór Postu Administrativu neen, ne’ebé responsavel ba jestaun Funsionáriu Públiku no Ajente Administrasaun Públika sira ne’ebé koloka iha postu administrativu ida-idak, atu lori esperiénsia no koñesimentu ne’ebé hetan durante diseminasaun ne’e, no fahe ba funsionáriu sira ne’ebé la konsege partisipa.
Tuir Komisária Anita, ida-ne’e importante atu funsionáriu sira hotu iha koñesimentu ne’ebé adekuadu kona-ba regra no prosedimentu, nune’e bele hala’o prestasaun servisu ho matenek, efisiénsia no efetividade.
Iha sorin seluk, Sekretáriu Munisipál Ermera, António da Costa Alves, reprezenta Prezidente Autoridade Munisipál Ermera iha abertura diseminasaun, hato’o mensajen husi Prezidente Autoridade Munisipál ba partisipante sira atu kumpre regra no partisipa ho kompletu durante loron lima.
António da Costa Alves hateten katak formasaun no diseminasaun ne’e importante tebes ba Funsionáriu Públiku sira, liuliu atu komprende no kumpre sira-nia dever no obrigasaun, no iha tempu hanesan komprende sira-nia direitu.
Nia subliña katak koñesimentu kona-ba Lei no prosedimentu bele ajuda funsionáriu sira atu evita irregularidade ne’ebé bele prejudika interese Estadu no, iha ikus, kontribui ba garantia boa governasaun.
Tuir Sekretáriu Munisipál, formasaun ne’e mos sai oportunidade ida ba funsionáriu sira atu hanoin fila-fali regra sira ne’ebé karik haluha ona. Ba sira ne’ebé seidauk hatene, diseminasaun ne’e bele fó koñesimentu foun, hodi aumenta koñesimentu no hasa’e kapasidade profisionál iha hala’o servisu.
Durante diseminasaun loron lima ne’e, total partisipante hamutuk ema 104, kompostu husi feto 43 no mane 61.
Enkuantu oradór sira ne’ebé mai husi instituisaun Estadu sira ne’e hamutuk ema 16, kompostu husi feto 7 no mane 9. Diseminasaun ne’e lao ho susesu no fó oportunidade ba funsionáriu sira iha Munisípiu Ermera atu komprende kle’an liután kona-ba Lei, Dekretu-Lei no prosedimentu sira, hodi bele implementa sira iha servisu loro loron no kontribui ba prestasaun servisu públiku ne’ebé profisionál, efisiente no efetivu.