Kinta-feira, 22 Outobru 2026 – Reuniaun regulár trimestrál datoluk ba inspetór no auditór sira husi entidades setór públiku administrasaun tinan 2026 ne’ebé organiza husi Polísia Siéntifika no Investigasaun Kriminál (sigla português PCIC), hala’o durante loron rua (22-23 Outobru 2026) iha Munisipiu Baucau.
Reuniaun regulár trimestrál ne’e ho objetivu, atu garante atividade inspetór no auditór sira nian ho efetivu, estabelese reuniaun regulár períodika entre inspetores no auditores iha administrasaun públika direta no indireta sira, hodi partilla, atualiza no diskute kona-ba substánsia téknika sira relasiona ho natureza servisu inspesaun no auditária nian.
Komisáriu Komisaun Funsaun Públika (KFP), asuntu dixiplinar Agapito da Conceição hateten, reuniaun ne’e atu hodi identifika forsa no lakunas ne’ebé sai barreira, tau hamutuk hanoin hirak ne’ebé konstrutivu, diskuti asaun sira ba melloramentu mekanizmu no meiu oioin, tantu teknikamente ka intervensaun sira mais altu, hodi responde ba ejizénsia no ezisténsia unidade kontrolu ida ne’ebé iha kualidade.
Inspetor Inspesaun Jeral Estadu (sigla português IGE), Francisco de Carvalho hateten, enkontru ida ne’e, atu hasa’e kualidade servisu iha kada ministérius, hodi bele hasa’e liu tan koñesementu sira iha área kontrolu nian.
Iha parte seluk, reprezentante Ministériu Justisa (MJ), Diretór Nasionál Polísia Siéntifiku no Investigasaun Kriminál Vicente Fernandes e Britos hateten, reuniaun ida ne’e atu partilla ba malu situasaun sira relativamente ho asuntu kontrolu internu nian, iha idak-idak nia instituisaun, além de ne’e ekoraja atu reuniaun ne’e ekipa sanulu-resin-ida bele hato’o ba IGE no KFP atu hodi forma Lei ruma hodi proteze inspetores no auditores sira.
Durante loron rua ne’e, iha aprezentasaun husi PCIC, INSS no KFP maka hanesan; Organizadu no Transnasional Scam Center “Ameasa ba Seguransa Nasionál no Krime Transnasionál”, husi Diretór Nasionál PCIC Vicente Fernandes e Brito, husi Xefe Departamentu Asesoria no Relasaun Públika Lolita Abrantes kona-ba Panorama Jeral PCIC, husi espesialista Beatriz da Cruz Ximenes husi Laboratóriu Polísia Siéntifika kona-ba Setór Fíziku Dokumentál, husi Ricardo Soares ho tópiku Relatóriu Dezempeñu Ezekusaun Orsamentu Trimestre tinan 2026 PCIC nian, Prezidente KFP Agostinho Letêncio de Deus kona-ba Prespetiva CFP ba desenvolvimentu integridade no desenvolvimentu sistema méritu administrasaun públika no Asesora Institutu Nasionál Seguransa Sosial (INSS) Délia Belo halo aprezentasaun kona-ba sistema seguransa sosial iha Timor-Leste nian.
Além de aprezentasaun hirak ne’e, iha mós koordenador Ekipa-11 relata servisu hanesan, koordernasaun entre Inspetores no Auditores Administrasaun Públika no aktualizasaun servisu kada liñas miniterias.
Antes ensera reuniaun regular ne’e, Prezidente KFP Agostinho Letêncio de Deus hateten, partisipante enkontru ne’e tenke deskuti ona saida maka iha administrasaun públika, apresia ba kontribuisaun tomak, no fiar katak administrasaun públika sei iha kualidade.
KFP nafatin suporta no sujere ba ekipa-11 atu hamutuk ho Ministériu Finansas (MF) hodi bele hamosu resolusaun ida, atu hodi hadiak liu tan administrasaun públika Timor Leste nian.
Inspetores no Auditores husi liñas ministeriais sira kompostu husi SEI, CFP, IPTL, SECOOP, MCI, MI, MTC, MJDAC, CLN, MAPPF, MPIE, PDHJ, MESCC, MDRHC, UNTL, IGE, MOP, UNTL no MS. Reuniaun regulár trimestrál ba dahaat iha tinan 2026 nian sei lidera husi Ministériu Ensinu Superior Siensia no Kultura (sigla português MESCC).
